पुणे- संत ज्ञानेश्वर महाराज पालखी सोहळ्यावर मागील वर्षी प्रमाणे यावर्षीही कोरोना महामारीचे सावट आहे. यामुळे मागील वर्षी झालेल्या चुका टाळून, यावर्षीही माऊलींचा पालखी सोहळा मोजक्याच भाविकांच्या उपस्थितीत साजरा व्हावा, अशी मागणी आळंदी ग्रामस्थांच्या वतीने करण्यात आली आहे. तर वारकरी पालखी सोहळा पायी व्हावा यावर ठाम आहेत. गावकरी व वारकरी यांच्यात वाद निर्माण झाला आहे.
शासनाच्या निर्णयाशी सहमत आळंदी ग्रामस्थ-
मागील वर्षभरात कोरोनाने मोठे संकट लोकांसमोर उभे केले आहे. यात अनेक लोकांना जीव गमवावा लागला आहे. कोरोना संकट अजूनही पुर्णपणे संपलेले नाही. गर्दीमुळे कोरोनाचा प्रसार जास्त होतो. त्यामुळे गर्दी नियंत्रित राहावी व पालखी सोहळ्यामुळे कोरोना संकट वाढु नये, म्हणून यावर्षीही शासनाने आळंदी पंढरपूर पालखी सोहळा मोजक्याच भाविकांत साजरा करावा, अशी मागणी आळंदी ग्रामस्थांच्या वतीने करण्यात आली आहे. तर वारकरी पालखी सोहळा पायी व्हावा यावर ठाम आहेत. परंतु पालखी सोहळा मोजक्या भाविकांच्या उपस्थितीत व बसने नेण्याचा निर्णय शासनाने यापुर्वीच घेतला आहे. शासनाच्या या निर्णयात ग्रामस्थांची सहमती आहे.