होर्डिंग लावून तिकीट मिळत नाही, काम पाहूनच तिकीट देणार - मुख्यमंत्री

पुढच्या पाच वर्षात दुष्काळमुक्त महाराष्ट्र करण्याचे उदिष्ट असल्याचे वक्तव्य मुख्यमंत्री देवेंद्र फडणवीस यांनी केले. तसेच होर्डिंग लावून कोणाला तिकिट मिळणार नाही. काम पाहून तिकिट देणार असल्याचे मुख्यमंत्री म्हणाले.

पुणे - पुढच्या पाच वर्षात दुष्काळमुक्त महाराष्ट्र करण्याचे उदिष्ट असल्याचे वक्तव्य मुख्यमंत्री देवेंद्र फडणवीस यांनी केले. तसेच होर्डिंग लावून कोणाला तिकिट मिळणार नाही. काम पाहून तिकिट देणार असल्याचे मुख्यमंत्री म्हणाले. पाच वर्षात आम्ही केलेल्या कामाबद्दल जनता समाधानी असून, आम्हाला प्रचंड समर्थन आहे. लवकरच युतीचीही घोषणा करणार असल्याचेही मुख्यमंत्री म्हणाले.

भाजपच्या महाजनादेश यात्रेचे शनिवारी पुण्यात आगमन झाले. त्यानंतर आज मुख्यमंत्री देवेंद्र फडणवीस यांनी पत्रकार परिषद घेतली. यामध्ये त्यांनी सरकारने पाच वर्षाते केलेल्या कामांचा पाढा वाचला. त्यानंतर पुण्यात भाजप नेत्यांनी लावलेल्या एका होर्डिंगमुळे रुग्णवाहिकेला अडथळा निर्माण झाला होता. त्यावरून मुख्यमंत्र्यांनी होर्डिंग लावणाऱ्यांचे कान टोचले आहेत.

गेल्या ५ वर्षात महाराष्ट्र सगळ्या बाबतीत अग्रेसर आहे. पश्चिम महाराष्ट्रात मोठ्या प्रमाणात धरणांची कामे झाली आहेत. बंद पडलेले सर्व प्रकल्प मार्गी लावले आहेत. जुन्या सरकारमध्ये पश्चिम महाराष्ट्रातले अनेक मंत्री होते, तरी कामे झाली नाहीत. मात्र, आमच्या सरकारने सर्व प्रकल्पांची कामे पूर्ण केली, अद्यापही कामे चालू असल्याचे मुख्यमंत्री म्हणाले.

आता मेगा भरती नाही पण भरती आहे
आणखी भाजपमध्ये मेगा भरती होणार आहे का? असा प्रश्न केला असता मुख्यमंत्री म्हणाले, की आता मेगा भरती नाही मात्र, भरती जरुर आहे. यावरुन आणखी भाजपमद्ये काही नेते प्रवेश करणार असल्याचे समजते.

जे द्राक्ष मिळत नाही ते आंबट
उदयनराजेंचा त्रास सहन करणार का? असा प्रसारमाध्यमांनी प्रश्न केला असता मुख्यमंत्री म्हणाले, की जे द्राक्ष मिळत नाही ते आंबट असते. उदयनराजे त्यांच्यासोबत होते तोपर्यंत चांगले होते, आमच्याकडे आले की वाईट कसे झाले. असे म्हणत त्यांनी विरोधकांवर निशाणा साधला.

विधानसभेसाठी इच्छुकांची केली कानउघडणी

तिकीट बॅनरबाजी नाही तर काम पाहून मिळते, असे म्हणत मुख्यमंत्र्यांनी विधानसभेसाठी इच्छुकांची कानउघडणी केला. भाजपच्या पदाधिकाऱ्यांनी, कार्यकर्त्यांनी कुठेही अनधिकृत बॅनर लावू नये. ज्यांनी ज्यांनी शहरात असे बॅनर लावले असतील त्यांच्यावर पक्षांतर्गत कारवाई केली जाईल, असेही मुख्यमंत्री म्हणाले.

देवेंद्र फडणवीस यांची महाजनादेश यात्रा शनिवारी पुणे शहरात पोहोचली. यावेळी त्यांना खुश करण्यासाठी भाजप पदाधिकारी आणि विधानसभेसाठी इच्छुकांनी शहरभर अनधिकृत बॅनर लावल्याचे चित्र पहायला मिळाले. कर्वे रोडवर बॅनरमुळे रुग्णवाहिका अडकली असल्याचं दिसून आलं. याबद्दल फडणवीस यांना विचारलं असता त्यांनी अनधिकृत बॅनरबाजी करणाऱ्या भाजप पदाधिकाऱ्यांची कानउघडणी केली.

झाडे तोडणाऱ्यांवर कारवाई करणार
महाजनादेश यात्रेच्या मार्गावरील काही झाडे तोडण्यात आली आहेत. याबद्दल विचारलं असता कोठेही झाडे तोडण्यात आल्याचं दिसले नाही. मात्र, अशा प्रकारे एकही झाड तोडले असेल तर कारवाई करणार असल्याचं मुख्यमंत्र्यांनी सांगितले.