पुणे - जिद्दीच्या जोरावर व्यक्ती काय करू शकते याचे मूर्तिमंत उदाहरण एका तरुणाने घालून दिले आहे. जन्मताच दृष्टीहीन असलेल्या तरुणाने त्यावर मात करत केवळ आवाज आणि स्पर्शाचा जोरावर लोणावळा येथील कातळधार धबधबा येथे रॅपलिंग करत तब्बल ४५० फुट खोल खाली उतरला आहे. या ठिकाणी डोळस व्यक्तीला खाली उतरण्यासाठी २० मिनिट लागतात. मात्र, या तरुणाने अवघ्या चार मिनिटात हे काम फत्ते केले आहे. त्यामुळे त्याचे सर्व स्तरांतून कौतुक होत आहे. अजय ललवाणी (वय २४, रा. उल्हासनगर, मुंबई) असे या तरुणाचे नाव आहे. भविष्यात त्याचा माउंट एव्हरेस्ट सर करण्याचा मानस आहे.
अंध म्हणून तो इतर व्यक्तींसारखा घरी बसला नाही किंवा हताश झाला नाही. जन्मताच तो दृष्टीहीन आहे. मात्र, तरीदेखील त्याला दिसत नसल्याने कोणतीच अडचण आली नाही. त्याच्या या कामगिरीमुळे तरुणांना प्रेरणा मिळत आहे. तो सर्व प्रकारचे खेळ खेळतो. यात क्रिकेट, फुटबॉल, सायकलिंग, ज्यूदो हे त्याचे आवडीचे प्रकार आहेत. तो मुंबई महानगर पालिकेत टेलिफोन ऑपरेटर म्हणून काम करतो. तसेच आपल्या कुटुंबाची आर्थिक मदत करतो आहे.