चाकण मराठा आंदोलन हिंसाचार; राष्ट्रवादी काँग्रेसचे माजी आमदार दिलीप-मोहितेंना अटकपूर्व जामीन मंजूर

चाकण येथे झालेल्या मराठा समाजाच्या आंदोलनाला हिंसक वळण लागले होते. त्यामध्ये सरकारी व खासगी असे मोठ्या प्रमाणात नुकसान झाले होते व पोलिसांनाही मारण्याचा प्रयत्न केला होता. या आंदोलनात मुख्य सूत्रधार म्हणून दिलीप मोहितेंवर आठ महिन्यांनंतर गुन्हा दाखल करण्यात आला होता.

पुणे- मराठा क्रांती मोर्चाच्या आंदोलनादरम्यान चाकण येथे झालेल्या हिंसाचार प्रकरणी खेडचे राष्ट्रवादी काँग्रेसचे माजी आमदार दिलीप मोहिते-पाटील यांना संशयित आरोपी ठरवण्यात आले होते. दिलीप मोहिते यांनी राजगुरुनगर जिल्हा व अतिरिक्त सत्र न्यायालयात अटकपूर्व जामीनासाठी अर्ज दाखल केला. मात्र, त्यांचा जामीन अर्ज फेटाळण्यात आला होता. याच जामीन अर्जावर उच्च न्यायालयात अपिल करण्यात आले होते. त्यावर उच्च न्यायालयाचे न्यायाधीश रेवती डेरे-मोहिते यांच्या कोर्टाने दिलीप-मोहितेंचा जामीन अर्ज मंजूर केला आहे.

मुंबई उच्च न्यायालयाचे न्यायाधीश रेवती डेरे-मोहिते यांच्यासमोर मोहिते यांच्या बाजूने त्यांचे वकील अँड. मनोज मोहिते, तपन थत्ते यांनी युक्तिवाद केला तर, सरकारच्या बाजूने सरकारी वकील श्रीकांत गावंड यांनी युक्तिवाद केला. दोघांचेही म्हणणे ऐकून घेतल्यावर आज निर्णय देत न्यायालयाने दिलीप मोहिते यांचा अटकपुर्व जामीन अर्ज मंजूर केला आहे.

चाकण येथे झालेल्या मराठा समाजाच्या आंदोलनाला हिंसक वळण लागले होते. त्यामध्ये सरकारी व खासगी असे मोठ्या प्रमाणात नुकसान झाले होते व पोलिसांनाही मारण्याचा प्रयत्न केला होता. या आंदोलनात मुख्यसुत्रधार म्हणुन दिलीप मोहितेंवर आठ महिन्यांनंतर गुन्हा दाखल करण्यात आला होता. मात्र, ही कारवाई विधानसभा डोळ्यासमोर ठेवूनच केली जात असल्याचे दिलीप मोहितेंनी सांगितले होते. त्याचा निषेध म्हणून मराठा तरुणांनी गावागावात निषेध सभाही घेतल्या होत्या.

मराठा समाजाच्या आरक्षणासाठी असंख्य तरुण रस्त्यावर आले. मात्र, याच आंदोलनात काही समाजकंठकांनी जाळपोळ करत हिंसक वळण लागले. मात्र, या आंदोलनाच्या उद्रेकाला पोलिसांनी मोहितेंना जबाबदार धरले. आज उच्च न्यायालयात अटकपुर्व जामिनावर दोन्ही बाजुंचा युक्तिवाद होऊन उच्च न्यायालयाने अटकपुर्व जामीन मंजूर केला आहे.