अभ्यास का करत नाही म्हणत पित्याची मुलीला बेदम मारहाण

अभ्यास करत नसल्याच्या कारणावरून पित्याने सात वर्षाच्या मुलीला बेदम मारहाण केली. पुणे येथील ताडीवाला रस्ता परिसरात मंगळवारी रात्री ही घटना घडली.

पुणे -पुणे येथील बंडगार्डन पोलीस ठाण्याच्या हद्दीत एक धक्कादायक प्रकार उघडकीस आला. अभ्यास करत नसल्याच्या कारणावरून पित्याने सात वर्षाच्या मुलीला बेदम मारहाण केली. ताडीवाला रस्ता परिसरात मंगळवारी रात्री ही घटना घडली. शेजारी राहणाऱ्या तरुणाने तक्रार दिल्यानंतर पोलिसांनी गुन्हा दाखल करीत संबधित पित्याला अटक केली आहे. नागेश महादेव जाधव (वय 36) असे अटक केलेल्या पित्याचे नाव आहे. बंडगार्डन पोलीस ठाण्यात याप्रकरणी गुन्हा दाखल करण्यात आला आहे.

शेजाऱ्याने मुलीला वाचवले

आरोपी नागेश जाधव हा ताडीवाला रस्ता परिसरात पत्नी आणि सात वर्षाच्या मुलीसह राहतो. मोलमजुरी करून नागेश कुटुंबाचा उदरनिर्वाह चालवतो. दरम्यान मंगळवारी रात्रीच्या सुमारास त्याने अभ्यास का करत नाहीस, असे म्हणत सात वर्षाच्या मुलीला मारहाण केली. मुलीच्या रडण्याचा आवाज ऐकून शेजारी राहणारे काही नागरिक नागेशच्या घरी आले. त्यावेळी नागेश हा आपल्या सात वर्षाच्या मुलीला लाटण्याने आणि पोळपाटाने मारहाण करत असल्याचे दिसून आले.

पोलिसांनी घेतले ताब्यात

नागेशच्या घरी आलेल्या नागरिकांनी या मुलीला नागेशच्या तावडीतून वाचवले. मात्र, त्यानंतरही अभ्यास का करत नाहीस, असे म्हणत नागेशने मुलीला पुन्हा मारहाण केली. दरम्यान, येथील एका व्यक्तीने या घटनेची माहिती पोलिसांना दिली. त्यानंतर पोलिसांनी घटनास्थळी जाऊन नागेशला ताब्यात घेतले. आज नागेशला न्यायालयात हजर करण्यात येणार असल्याची माहिती वरिष्ठ पोलीस निरीक्षक गवारी यांनी दिली.

हेही वाचा -शरद पवार यांचा सरकारला पूर्ण आशीर्वाद - संजय राऊत