पुणे - पुण्यातील काही भागात कोरोनाचे जास्त रुग्ण आढळल्यामुळे हे भाग सील करण्यात आले आहेत. या भागातील पोलीस बंदोबस्तही वाढवण्यात आला आहे. किराणा साहित्य, भाजीपाला आणि इतर अत्यावश्यक वस्तूंच्या खरेदीसाठी अशा भागात 10 ते 12 या दोन तासांसाठी शिथिलता देण्यात आली आहे. मात्र, काही नागरिक याचा गैरफायदा घेताना दिसत आहेत. आपला परिसर सोडून इतर परिसरात फिरताना काही नागरिक आढळले आहेत. यावर कारवाई करत स्वारगेट पोलिसांनी गुरूवारी सकाळपासून 150 लोकांना ताब्यात घेतले. आणि त्यांची वाहने जप्त केली. पोलिसांनी त्यांना दोन ते तीन तास बसवून ठेवले आणि त्यानंतर पायी चालत घरी पाठवले.
विनाकारण फिरणारे हे नागरिक स्वतःसह पोलिसांचाही जीव धोक्यात टाकत आहेत. त्यांची ही वर्तणूक चुकीची असल्याची जाणीव करून देण्यासाठी त्यांच्यावर ही कारवाई केली जात आहे, अशी माहिती स्वारगेट पोलीस ठाण्याचे वरिष्ठ पोलीस निरीक्षक ब्रह्मा नाईकवडी यांनी दिली.