बारामती (पुणे)- बारामतीत मागील काही दिवसांत मोठ्या प्रमाणात कोरोनाचा प्रादुर्भाव वाढला आहे. तीन दिवसांत तीनशेहून अधिक रुग्ण सापडले आहेत. हा वाढता प्रादुर्भाव रोखण्याच्या दृष्टीने बारामती नगरपालिकेच्या नगराध्यक्षा पौर्णिमा तावरे यांनी चौदा दिवसांच्या जनता कर्फ्यूची घोषणा केली होती. मात्र, विश्वासात न घेता हा निर्णय घेतल्याचा आरोप करत बारामतीतील व्यापाऱ्यांनी याबाबत तीव्र नाराजी दर्शविली आहे. यामुळे 14 दिवसांच्या जनता कर्फ्यूची मुदत आता सात दिवसांवर आणण्यात आली आहे.
दरम्यान, काल (शुक्रवारी) उपमुख्यमंत्री अजित पवार यांच्याशी व्यापाऱ्यांनी संपर्क साधून जनता कर्फ्यूचा कालावधी कमी करण्याची विनंती केली. त्यानंतर प्रशासनासोबत व्यापाऱ्यांच्या झालेल्या बैठकीत 14 दिवसांऐवजी सात दिवसांचा जनता कर्फ्यू करण्याचा निर्णय घेण्यात आला आहे. मात्र, या सात दिवसांच्या कालावधीत कोरोना रुग्णांची संख्या आटोक्यात आली नाही. तर पुढील कालावधीसाठी जनता कर्फ्यू कायम राहणार असल्याचे सांगण्यात आले आहे.