पुणे-राज्यात सुरू असलेल्या मुसळधार पावसाने पुणे विभागात आतापर्यंत 16 जणांचा बळी घेतला आहे. यामध्ये सातारा जिल्ह्यातील 7, पुणे 4, सांगली 2, कोल्हापूर 2 आणि सोलापूर जिल्ह्यातील एका नागरिकाचा समावेश आहे, अशी माहिती विभागीय आयुक्त दिपक म्हैसेकर यांनी पत्रकार परिषदेत दिली.
आतापर्यंत विभागात 137 टक्के पाऊस झाला असुन, 58 तालुक्यांपैकी 30 तालुक्यात अतिवृष्टी झाली आहे. सातारा, सांगली आणि कोल्हापूर या तीन जिल्ह्यात पुढील तीन दिवस अतिवृष्टीचा इशारा हवामान खात्याने दिला आहे. भीमा नदी खोरे क्षेत्रातील परिस्थिती सुधारत आहे. हळूहळू जनजीवन पुर्वपदावर येत आहे. पुणे विभागात एकूण 1,32,360 लोकांना स्थलांतरित केले आहे. दरम्यान, कोल्हापूरमधील 390 गावांचा, साताऱ्यातील 91 गावांचा पाणी पुरवठा बंद आहे. तो पूर्ववत करण्याचा प्रयत्न सुरू आहे. तसेच वैद्यकीय पथकही काम करत आहे.
पुणे जिल्ह्यातील मावळ, मुळशी, भोर, वेल्हा, जुन्नर, आंबेगाव, शिरुर, खेड या 8 तालुक्यात अतिवृष्टी झाली आहे. यामुळे निर्माण झालेल्या पुरसदृश्य स्थितीमुळे 3,343 कुटुंबातील 13,336 नागरिकांना स्थलांतर करण्यात आले. या नागरिकांना महानगरपालिका शाळा, जिल्हा परिषद व इतर सार्वजनिक इमारतीमध्ये स्थानांतरित करण्यात आले आहे.
