परभणी - गेल्या चार दिवसांपासून परभणीत उष्णतेची लाट निर्माण झाली आहे. आज शनिवारी परभणीत तब्बल 46 अंश डिग्री सेल्सिअस एवढे तापमान नोंदविण्यात आले आहे. या मौसमातील हे उच्चांकी तापमान असून त्यामुळे परभणीकरांना उकाड्याचा त्रास सहन करावा लागत आहे.
परभणीत मौसमातील उच्चांकी तापमानाची नोंद यावर्षी फेब्रुवारीच्या शेवटच्या आठवड्यातच परभणीच्या तापमानात काहीशी वाढ झाली होती. मात्र, मार्च महिन्यात तुरळक प्रमाणात झालेला अवकाळी पावसामुळे वातावरणात गारवा पसरला होता. गेल्या 8 दिवसात तापमानात वाढ होऊन हे तापमान 45.7 अंशावर पोहोचले. तर आजचे तापमान 46 अंशावर पोहोचले आहे. या वाढलेल्या तापमानामुळे नागरिक सकाळी ११ नंतर घराबाहेर पडताना दिसत नाहीत.
तापमानामुळे शहरात बाजारपेठा ओस पडल्या आहेत. तसेच दुसरीकडे ताप, खोकला यासारख्या साथीच्या आजारांमध्ये वाढ झाल्याचे दिसून येत आहे. विशेषत: लहान मुलांना वाढत्या तापमानाचा सामना करताना मोठा त्रास सहन करावा लागत आहे.
डॉक्टरांचा सल्ला -
लहान मुलांना रूमाल बांधल्याशिवाय बाहेर पाठवू नये, अंगावर सैल आणि कॉटनचे कपडे घालावेत, तीव्र किरणांपासून बचाव करण्यासाठी गॉगल्स वापरावेत. तसेच पाणीदार फळे टरबुज, अंगुर, खरबुज, काकडी शिवाय फळांचे ज्युस, सरबत आणि उसाचा रस नियमित सेवन करण्याचा सल्ला डॉक्टर्स देत आहेत.
'या' ठिकाणी 1 अंश तापमान कमी -
परभणी शहरामधील तापमान 46 अंश नोंदवले गेले असले तरी वसंतराव नाईक मराठवाडा कृषी विद्यापीठाच्या हवामान विभागात आज शनिवारचे कमाल तापमान 45 अंश एवढे नोंद झाले आहे. कारण कृषी विद्यापीठाच्या परिसरात सर्वत्र हिरवळ असून त्या हिरवळीचा परिणाम या ठिकाणच्या तापमानावर जाणवतो.
