परभणीत काँग्रेसला दोन मतदारसंघात तर उमेदवारच नाही

परभणी जिल्ह्यातील चार विधानसभा मतदारसंघांसाठी मंगळवारी इच्छुकांच्या मुलाखती पार पडल्या. मात्र यावेळी काँग्रेस कडून उमेदवारीसाठी इच्छुकांची संख्या ढेपाळल्याचे चित्र दिसून आले. परभणीत दोन मतदार संघात तर एकही इच्छुक उमेदवार नाही, अशी दयनीय अवस्था पहायला मिळाली आहे.

परभणी -जिल्ह्यातील चार विधानसभा मतदारसंघांसाठी मंगळवारी इच्छुकांच्या मुलाखती पार पडल्या. यावेळी राज्यभराप्रमाणे परभणीतही काँग्रेसकडून निवडणूक लढवू इच्छिणाऱ्यांची संख्या ढेपाळल्याचे पाहायला मिळाले. परभणीचे पालक असलेले माजी मंत्री व काँग्रेसचे ज्येष्ठ नेते डी.पी. सावंत यांनी मात्र काँग्रेसला उमेदवार मिळेल आणि जिंकूनही येईल असा विश्वास व्यक्त केला आहे.

परभणीतील काँग्रेसचे ज्येष्ठ नेते डी.पी. सावंत, बी.आर.कदम, भीमराव गायकवाड आदींसह जिल्हाध्यक्ष सुरेश वरपूडकर व जिल्ह्यातील प्रमुख पदाधिकाऱ्यांनी काँग्रेस भवन येथे मंगळवारी इच्छुकांच्या मुलाखती घेतल्या. परभणी विधानसभेसाठी तब्बल 16 उमेदवार इच्छुक आहेत. पाथरीसाठी मात्र एकमेव जिल्हाध्यक्ष सुरेश वरपुडकर यांनी मुलाखत दिली. तर जिंतूर आणि गंगाखेड विधानसभेतून एकही इच्छुक उमेदवार मुलाखतीसाठी आला नाही.

काँग्रेसच्या जुना गड राहिलेल्या परभणी जिल्ह्यात सध्य परिस्थितीत काँग्रेसचा एकही आमदार नाही. काँग्रेसची जागा आता राष्ट्रवादीने घेतली आहे. खासदार-आमदार सेनेचे आणि स्थानिक स्वराज्य संस्थांवर राष्ट्रवादीचे वर्चस्व असे समीकरण गेल्या काही वर्षात जिल्ह्यात दिसून येते. त्यात काँग्रेसला फारसे स्थान राहिलेले नाही. असे असले तरी काँग्रेसचे जुने जाणते पुढारी मात्र अजूनही काँग्रेससाठी तळमळ करत असतात.

गंगाखेड आणि जिंतूर विधानसभेतून मात्र कोणीही मुलाखतीसाठी आले नाही. गंगाखेडचे तालुकाध्यक्ष गोविंद यादव यांनी उमेदवारीसाठी अर्ज केला. परंतु प्रत्यक्षात ते मुलाखतीसाठी हजर राहिले नाहीत. त्यामुळे या दोन्ही मतदारसंघात काँग्रेस निवडणूक लढवणार नसल्याचे दिसून येते. विशेष म्हणजे या दोन्ही ठिकाणी राष्ट्रवादीचे आमदार निवडून आलेले आहेत. त्यामुळे त्यांचा दावा प्रबळ समजला जातो.

परभणीत बाहेरून आलेल्या उमेदवाराला विरोध

जिंतूरचे रहिवाशी तथा माजी आमदार दिवंगत कुंडलिकराव नागरे यांचे सुपुत्र सुरेश नागरे यांनी नुकताच भाजपमधून काँग्रेस मध्ये प्रवेश केल्याचे सांगण्यात येते. परंतु ऐनवेळी त्यांनी परभणीतून उमेदवारी मागितल्याने यावेळी स्थानिक पदाधिकाऱ्यांनी त्यांना विरोध केल्याचे दिसून आले. परंतु याबाबत बोलताना माजी मंत्री डी.पी. सावंत यांनी सांगितले की, भाजप-शिवसेनावाले मोठ्या प्रमाणात काँग्रेस-राष्ट्रवादीच्या लोकांना ओढून नेत आहेत. त्या तुलनेत आम्ही असे काही करत नाहीत. आमच्याकडे आलेल्यांना आम्ही प्रवेश देत आहोत. परंतु त्यांना उमेदवारी द्यायची की नाही, हे पक्ष श्रेष्ठी ठरवतील, असे त्यांनी स्पष्ट केले.