आरोग्य सुविधांसह सरकारी रुग्णालय अद्ययावत करणार - पालकमंत्री नवाब मलिक

पालकमंत्री नवाब मलिक म्हणाले की, देशातील जनतेने आपापली जबाबदारी व्यवस्थितपणे पार पडल्याने लोकशाही यशस्वी होण्यास मदत झाली आहे. लोकशाहीमध्ये प्रत्येक घटकाला समान संधी मिळाली पाहिजे, यासाठी सरकार कटिबद्ध आहे.

परभणी- आजवर विकासाच्या संकल्पनेत आरोग्य सेवांसाठी अधिक दक्षता घेण्याची गरज काळाने दाखवून दिली आहे. ही गरज लक्षात घेवून जनतेच्या आरोग्याची काळजी घेण्याच्या दृष्टीने उपलब्ध असलेल्या आरोग्य सुविधा आणि सरकारी रुग्णालये अद्ययावत करणार असल्याची ग्वाही राज्याचे अल्पसंख्याक विकास व औकाफ तथा परभणीचे पालकमंत्री नवाब मलिक यांनी दिली. याच दृष्टीने जिल्ह्यात वैद्यकीय महाविद्यालय साकारावे, या दृष्टीने नियोजन सुरू असल्याचेदेखील त्यांनी यावेळी स्पष्ट केले.

परभणी येथील प्रियदर्शनी इंदिरा गांधी क्रीडा संकुलातआज (मंगळवारी) प्रजासत्ताक दिनाचा मुख्य शासकीय ध्वजारोहण कार्यक्रम पार पडला. यावेळी बोलताना पालकमंत्री नवाब मलिक म्हणाले की, देशातील जनतेने आपापली जबाबदारी व्यवस्थितपणे पार पडल्याने लोकशाही यशस्वी होण्यास मदत झाली आहे. लोकशाहीमध्ये प्रत्येक घटकाला समान संधी मिळाली पाहिजे, यासाठी सरकार कटिबद्ध आहे.

पुढे पालकमंत्री मलिक म्हणाले की, महात्मा जोतिराव फुले कर्जमुक्ती योजनेच्या माध्यमातून मोठ्या प्रमाणावर शेतकऱ्यांना कर्जमाफी करण्यात आली. तसेच जे शेतकरी नियमित कर्जफेड करत असतात, अशा शेतकऱ्यांसाठी येणाऱ्या काळात एक नवीन योजना आखून त्यांना न्याय देण्याचा निश्चितच प्रयत्न केला जाणार असल्याचेही पालकमंत्री नवाब मलिक यांनी यावेळी सांगितले. भारतीय बनावटीची कोरोना लस ही अत्यंत सुरक्षित आहे. कुठल्याही अफवांना बळी पडू नये. कोरोनापासून आपला व कुटुंबातील सदस्याचा बचाव करण्यासाठी कोरोना लस सर्वांनी टोचून घ्यावी, असे आवाहनही त्यांनी यावेळी केले.

ध्वजारोहण

'वैद्यकीय महाविद्यालयाचा निर्णय निश्चित होईल' -कोरोना काळात परभणी जिल्हा प्रशासनाने विशेष कामगिरी केली. ती कामगिरी कौतुकास्पद आहे, असे सांगून आता कोव्हिड-19 वर नियंत्रण मिळविण्यात बऱ्याच प्रमाणात यश प्राप्त झाल्याचे मलिक म्हणाले. आपत्तीच्या काळात जिल्ह्यातील नागरिकांनी आपली जबाबदारी काळजीपूर्वकपणे पार पाडावी. जिल्ह्यातील विकासाची कामे करण्यासाठी आपण सदैव प्रयत्नशील आहोत. जिल्हा रुग्णालयाच्या आरोग्य सेवेतील सुधारणा करून अद्यावत सुविधा उपलब्ध करून देण्याचा मानस आहे. तसेच आगामी काळात राज्य शासनामार्फत परभणी शहरात वैद्यकीय महाविद्यालय सुरू करण्याबाबतचा निर्णय निश्चित होईल, अशी ग्वाहीदेखील मलिक यांनी दिली.चित्ररथांच्या माध्यमातून संदेश, संचालनातून मानवंदना -यावेळी परभणी पोलीस दल, गृहरक्षक दल, सैनिकी शाळा, बॉम्ब नाशक पथक, अग्निशामक दल, रुग्णवाहिका यांनी परेड संचालनातून मानवंदना दिली. तसेच कोव्हिड लसीकरण मोहीम, आरोग्य, कृषी, स्वच्छ भारत मिशन, महानगरपालिका, शिक्षण, महिला व बालविकास या विभागांनी सादर केलेल्या चित्ररथाच्या माध्यामातून विविध संदेश देण्यात आला.कोरोना योद्धांचा सन्मान -कोविड योद्धा म्हणून कोरोना काळात उत्कृष्ट कार्य केलेल्या डॉक्टर, पोलीस, महापालिका आदी विभागाच्या अधिकारी व कर्मचाऱ्यांचा गौरव करण्यात आला. तसेच उत्कृष्ट कामगिरी पार पाडलेल्या पोलीस अंमलदारांना पोलिस महासंचालकांचे सन्मानचिन्ह व प्रशस्तीपत्र प्रदान करण्यात आले. पालकमंत्री मलिक यांनी उपस्थित स्वातंत्र्यसैनिक व मान्यवरांची भेट घेवून शुभेच्छा दिल्या. या ध्वजारोहण समारंभाला कार्यक्रमास जिल्हा परिषद अध्यक्षा निर्मलाताई विटेकर, खासदार संजय जाधव, फौजिया खान, आमदार डॉ.राहुल पाटील, सुरेश वरपुडकर, जिल्हाधिकारी दीपक मुगळीकर, मुख्य कार्यकारी अधिकारी शिवानंद टाकसाळेव पोलिस अधिक्षक जयंत मीना यांची प्रमुख उपस्थिती होती. तसेच निवासी उपजिल्हाधिकारी महेश वडदकर, उपविभागीय अधिकारी डॉ.संजय कुंडेटकर यांची उपस्थिती होती.