परभणीत पोलीस कॉन्स्टेबल पत्नीचा खून करून पतीची आत्महत्या

शनिवारी दुपारी हे दाम्पत्य बाहेर गेले होते. घरी आल्यानंतर त्यांच्यात क्षुल्लक कारणाने वाद झाला. वाद होत असल्याचे पाहत कृष्णा माने याचा भाऊ आणि भावजय लहान मुलाला घेऊन शेजारच्या काकांकडे गेले. त्यानंतर वाद विकोपाला गेल्याने कृष्णा माने याने पत्नीवर वस्ताऱ्याने वार केले.

परभणी - शहराजवळच्या खानापूर भागात पोलीस कॉन्स्टेबल असलेल्या पत्नीचा घरगुती वादातून पतीने वस्ताऱ्याने वार करून खून केला. त्यानंतर संतापाच्या भरात पतीने देखील स्वतःवर वार करत आत्महत्या केल्याची खळबळजनक घटना शनिवारी दुपारी घडली. कमल जाधव-माने(वय २५) असे मृत पोलीस कर्मचारी महिलेचे नाव आहे. ती सध्या शहरातील नानलपेठ पोलीस ठाण्यात कार्यरत होती.

पती कृष्णा धोंडीबा माने (वय २९) हा शेतकरी होता. त्यांना 2 वर्षांचा मुलगा आहे. दरम्यान, घटनास्थळी असलेल्या नागरिकांनी दिलेल्या माहितीनुसार, शनिवारी दुपारी हे दाम्पत्य बाहेर गेले होते. घरी आल्यानंतर त्यांच्यात क्षुल्लक कारणाने वाद झाला. वाद होत असल्याचे पाहत कृष्णा माने याचा भाऊ आणि भाऊजय लहान मुलाला घेऊन शेजारच्या काकांकडे गेले. त्यांनंतर वाद विकोपाला गेल्याने कृष्णा माने याने पत्नीवर वस्ताऱ्याने वार केले. ज्यात कमल जाधव हिचा मृत्यू झाला. त्यानंतर कृष्णाने स्वत:च्या गळ्यावर वार करून आत्महत्या केली. कृष्णाला व्यसन होते, असे उपस्थितांनी सांगितले.

हेही वाचा -झिरवाळ यांनी मिळालेल्या संधीचे सोनं करावं, उपाध्यक्ष पदानंतर कार्यकर्त्यांच्या अपेक्षा वाढल्या

मृत कमल जाधव ही चारठाणा येथे कार्यरत असताना तिने कृष्णा विरोधात छळ केल्याची तक्रार दिली होती. कमलचे मूळगाव वसमत तालुक्यातील ईरेगाव असून कृष्णाचे मूळगाव पिंपरी देशमुख आहे. कृष्णाचे वडील सैन्यदलातून सेवानिवृत्त झाले असून सध्या शेती करतात. दरम्यान, या वादाचे नेमके कारण स्पष्ट झाले नाही. मात्र, कृष्णा हा कमलच्या चारित्र्यावर संशय घेत होता. त्यातूनच त्यांच्यात खटके उडत होते. मात्र, आज रागाच्याभरात भांडणातून त्यांचा अंत झाला.

घटनेची माहिती मिळताच सहायक पोलीस अधीक्षक नितीन बगाटे, नवा मोंढा पोलीस ठाण्याचे निरीक्षक रामेश्वर तट, बनसोडे व कर्मचाऱ्यांनी घटनास्थळी धाव घेतली. तर पोलीस अधीक्षक कृष्णकांत उपाध्याय यांनीही घटनास्थळाला भेट देवून माहिती घेतली असून या प्रकरणी त्यांनी अधिकाऱ्यांना चौकशीचे आदेश दिले आहेत.