परभणीत पावसाची दडी, पेरण्या खोळंबल्या; शेतकऱ्यांची नजर आकाशाकडे

पाऊस आला नाही तर पेरणी केलेल्या शेतकऱ्यांवर दुबार पेरणीचे संकट ओढावणार असल्याची भीती व्यक्त केली जात आहे. तसेच अनेक शेतकऱ्यांनी अजूनही पेरण्याच केल्या नाहीत, त्यांची नजर आकाशाकडे लागली आहे.

परभणी- जिल्ह्यात गेल्या चार दिवसांपासून पावसाने दडी मारली आहे. गेल्या २४ जूनला पावसाला सुरुवात झाली आहे. त्यानंतर आठ दिवस रोज बरसणाऱ्या पावसामुळे शेतकऱ्यांनी पेरणीची लगबग सुरू केली. परंतु आता पाऊस थांबल्याने पेरण्या कराव्यात की नाही? असा प्रश्न शेतकऱ्यांना पडला आहे. गेल्या अनेक वर्षांपासून दुष्काळाचा सामना करणाऱ्या परभणी जिल्ह्यातील शेतकऱ्यांची नजर आता आकाशाकडे लागली आहे.

परभणी जिल्ह्यात पावसाची सरासरी ७७४.२ मिमी एवढी आहे. परंतु गेल्या काही वर्षांत परभणी जिल्ह्यात सरासरीच्या ५० ते ६५ टक्के एवढा पाऊस झाला. यामुळे शेतकऱ्यांना कायम दुष्काळाचा सामना करावा लागत आहे. यावर्षीदेखील मान्सून लांबल्याने शेतकऱ्यांनी चिंता व्यक्त केली होती. परंतु २४ जून रोजी सुरू झालेला पाऊस पुढे ६ दिवस रिमझीम बरसला. २४ ते २९ जूनदरम्यान परभणी जिल्ह्यात ६१.७५ मिलिमीटर एवढा पाऊस पडला. त्यामुळे शेतकऱ्यांना पेरणीयोग्य वातावरण मिळाले; परंतु, त्यानंतर दमदार पावसाची अपेक्षा व्यक्त होत असतानाच गेल्या चार दिवसांपासून पावसाने दडी मारली आहे.

एक जुलै रोजी केवळ १२.५ मिमी पावसाचा अपवाद वगळता चार दिवसांपासून पावसाने हजेरी लावलेली नाही. त्यामुळे वातावरणातील उष्णता वाढली आहे. ज्या शेतकऱ्यांनी पेरण्या केल्या त्यांना दुबार पेरणीची भीती वाटत आहे, तर अनेक शेतकऱ्यांनी अजूनही पेरण्याच केल्या नाहीत. गेल्या काही वर्षांत अनुभव पाहता शेतकरी दमदार पाऊस पडल्याशिवाय पेरणी करत नाहीत, असे चित्र आहे.

यावर्षीदेखील शेतकऱ्यांनी मागचा अनुभवावरून पेरणीसाठी 'वेट अँड वॉच' ची भूमिका घेतली आहे. याचा परिणाम व्यापारावर झाला आहे. परभणी शहरातील नवा मोंढा भागात खरेदीसाठी शेतकरी येत नसल्याचे दिसून येत आहे. व्यापारी ग्राहकांच्या प्रतीक्षेत बसून आहेत, तर दुसरीकडे शेतकऱ्याचे डोळे आभाळाकडे लागले आहेत. अजून काही दिवस अशीच परिस्थिती राहिली तर पेरणी केलेल्या शेतकऱ्यांवर दुबार पेरणीचे संकट ओढावणार असल्याची भीती व्यक्त होत आहे.