पालघर- वसई-विरार महापालिकेचे सहायक आयुक्त प्रेमसिंग जाधव 2 दिवसापासून बेपत्ता आहेत. वसई विरार महापालिकेत मागच्या एक वर्षांपासून कोरोना रुग्णांच्या देखभालीचा प्रभारी पदभार प्रेमसिंग जाधव यांच्याकडे होता. प्रेमसिंग जाधव यांनी सहाय्यक आयुक्त पदावरून वसई विरार शहरातील अनेक अनाधिकृत बांधकामेही भुईसपाट केलेली आहेत.
2 जून रोजी कामावारून सुटल्यानंतर ते घरी परत गेलेच नाहीत. याबाबत विरार पोलीस ठाण्यात प्रेमसिंग जाधव बेपत्ता असल्याची तक्रार त्यांच्या कुटुंबियांकडून देण्यात आली आहे. पोलीस सूत्रांकडून मिळालेल्या माहितीनुसार प्रेमसिंग जाधव यांचे शेवटचे लोकेशन विरार रेल्वे स्थानकातील असल्याचे समजते. प्रेमसिंग जाधव हे अचानक बेपत्ता झाल्याने महापालिका वर्तुळात खळबळ उडाली आहे. त्यांना बेपत्ता केले की बेपत्ता झाले याविषयी आता पोलीस तपास करीत आहेत.