पालघर/वसई - मुख्यमंत्री उद्धव ठाकरे यांनी मुख्यमंत्रीपदी विराजमान होण्याआधी लोकसभा आणि विधानसभा निवडणुकीत वसईकरांना अनेक वर्षांपासून प्रलंबित असलेल्या 35 गावांचा मुद्दा मार्गी लावणार असल्याचे आश्वासन प्रचार धुमाळीत दिले होते. मात्र, वसई विरार महापालिकेची निवडणुक प्रक्रिया सुरू झाली असली तरी गावे वगळण्याचा प्रश्न सुटलेला नसल्याने ही गावे लवकर वगळावी यासाठी 'मी वसईकर अभियान'च्यावतीने गांधी जयंतीचे औचित्य साधून मुख्यमंत्र्यांनी दिलेल्या आश्वासनाची आठवण करून देण्यासाठी मौन अभियान राबवून स्मरण करुन दिले.
वसईच्या 'त्या' ३५ गावांसाठी ग्रामस्थांची गांधीगिरी!
यावेळी गावांसाठी प्रत्येक गावच्या एका प्रतिनिधीने आपल्या गावाच्या नावाचा फलक सोबत घेऊन मुख्यमंत्र्यांना गावांचे आश्वासन स्मरण करण्यासाठी दोन तासांचे मौन पाळले. वसई पश्चिमेकडील नरवीर चिमाजी आप्पा मैदानाबाहेर हे अभियान राबविण्यात आले.