पालघर (वसई) - सलग तिसऱ्या दिवशी वसई तालुक्यातील सर्व भागात पावसाची रिमझिम सुरू आहे. चार दिवसांपासून वसई-विरारमध्ये ढगाळ वातावरण पसरले आहे. अरबी समुद्रात कमी दाबाचा पट्टा निर्माण झाल्याने हवामान खात्याकडून अवकाळी पावसाची शक्यता वर्तवण्यात आली होती. त्यानुसार शहरी तसेच ग्रामीण भागात पावसाच्या सरी बरसत आहेत.
या अवकाळी पावसाचा जनजीवनावर परिणाम झाल्याचे दिसत आहे. ऐन थंडीच्या हुडहुडीत वसईकरांना पावसाचा अनुभव मिळत आहे. थंडीत घातल्या जाणाऱ्या स्वेटरऐवजी छत्र्या सोबत घेऊन फिरावे लागत आहे. फेरीवाले, भाजीविक्रेते यांनी पावसाळ्यानंतर दुकाने आणि गाड्यांवरील ताडपत्री काढून टाकली होती. मात्र, पावसामुळे पुन्हा लावावे लागले आहेत. तर कामाला जाणाऱ्या चाकरमान्यांची पावसामुळे त्रेधातिरपिट उडली आहे.