पालघर जिल्ह्यात बारावीचा निकाल ८३.०५ टक्के, मुलींनी मारली बाजी

बारावीचा निकाल मंगळवारी जाहीर केला. यात पालघर जिल्ह्याचा निकाल ८३.०५ टक्के लागला आहे. यात ८६.८८ टक्के मुलींचा निकाल लागला असून मुलींनी बाजी मारल्याचे दिसून आले आहे.

पालघर- महाराष्ट्र राज्य माध्यमिक व उच्च माध्यमिक शिक्षण मंडळाने बारावीचा निकाल मंगळवारी जाहीर केला. यात पालघर जिल्ह्याचा निकाल ८३.०५ टक्के लागला आहे. यात ८६.८८ टक्के मुलींचा निकाल लागला असून मुलींनी बाजी मारल्याचे दिसून आले आहे.

वसई तालुक्याचा सर्वाधिक म्हणजेच ८७.३२ टक्के निकाल लागला आहे. पालघर जिल्ह्यातून एकूण ४२ हजार ७८ विद्यार्थ्यांनी बारावीच्या परीक्षा देण्यासाठी नोंदणी केली होती. त्यांपैकी २२ हजार ९५७ मुले व १९ हजार ७८ मुली असे एकूण ४२ हजार ३५ विद्यार्थी प्रत्यक्ष परीक्षेसाठी बसले. यापैकी १८ हजार ३३७ मुले व १६ हजार ५५७ असे एकूण ३४ हजार ९१२ विद्यार्थी उत्तीर्ण झाले आहेत. तसेच पुनर्परिक्षेला बसलेल्या १ हजार ८४० विद्यार्थ्यांपैकी ५७५ विद्यार्थी उत्तीर्ण झाले आहेत.

संपूर्ण जिल्ह्यात मुलींच्या उत्तीर्णतेचे प्रमाण ८६.८८ टक्के तर मुलांच्या उत्तीर्ण होण्याचे प्रमाण ७९.८८ टक्के इतके आहे. मुलांपेक्षा मुलींचे उत्तीर्ण होण्याचे प्रमाण ७ टक्क्यांनी अधिक आहे.

पालघर जिल्ह्यात विज्ञान शाखेतून एकूण ९ हजार ३८१ विद्यार्थी उत्तीर्ण झाले असून ही टक्केवारी ८७.३१ टक्के इतकी आहे. वाणिज्य शाखेतून १६ हजार ६८३ विद्यार्थी उत्तीर्ण झाले असून ही टक्केवारी ८७.५० इतकी आहे. कला शाखेतून ८ हजार ४२० विद्यार्थी उत्तीर्ण झाले असून ही टक्केवारी ७१.९५ इतकी आहे. व्यवसायिक व तंत्रज्ञान शिक्षणातून एकूण ४२८ विद्यार्थी या शाखेमध्ये उत्तीर्ण झाले असून ही टक्केवारी ८२.६३ टक्के इतकी आहे.