पालघर - महाराष्ट्र नवनिर्माण सेनेने पालघर लोकसभा मतदार संघात बहुजन विकास आघाडीचे उमेदवार बळीराम जाधव यांना जाहीर पाठिंबा दिला आहे. त्यामुळे पालघर मतदारसंघात बहुजन विकास आघाडीच्या 'रिक्षा'ला मनसेचे इंजिनही पुढे ढकलणार आहे.
मनसेचा बहुजन विकास आघाडीला पाठिंबा
राजगडावर पालघरमधील कार्यकर्ते आणि मनसे अध्यक्ष राज ठाकरे यांच्यामध्ये झालेल्या चर्चेनंतर पालघर लोकसभा मतदारसंघात बहुजन विकास आघाडीला पाठिंबा देण्यावर शिक्कामोर्तब करण्यात आला. त्यानंतर मनसेचे ठाण्याचे जिल्हाध्यक्ष अविनाश जाधव आणि बहुजन विकास आघाडीचे अध्यक्ष हितेंद्र ठाकूर यांची चर्चा झाली. राज ठाकरेंच्या आदेशाने बहुजन विकास आघाडीला पाठिंबा देत असल्याची मनसेची भूमिका जाधव यांनी स्पष्ट केली. पालघर मतदारसंघात मनसेचे कार्यकर्ते बहुजन विकास आघाडीचा प्रचार करणार आहेत.