पालघर - शिवसेना नेते एकनाथ शिंदे यांच्यासोबत ( Maharashtra Political Crisis ) बंडात सहभागी झालेल्या आमदारांना अनेक अडचणीना सामोरे जावे लागत आहे. आता पालघरचे आमदार श्रीनिवास वनगा यांना वेगळ्याच संकटाला सामोरे जावे लागले आहे. वनगा यांना त्यांच्याच फेसबुक पेजवरून टोला लगावण्यात आला आहे. त्यामध्ये त्यांना थेट 'गद्दार' म्हणून शिक्का मारून पोस्ट करण्यात आली. त्यावरती जिल्ह्यातील शिवसैनिकांनी सुद्धा टीका केली ( shrinivas vanga Traitor facebook post viral ) आहे.
श्रीनिवास यांचे वडिल चिंतामण वणगा हे भाजपचे ज्येष्ठ नेते आणि खासदार होते. त्यांच्या निधनानंतर पालघर लोकसभा मतदारसंघाच्या पोटनिवडणुकीत भाजपने श्रीनिवास यांना उमेदवार देण्यास नकार दिला. श्रीनिवास यांच्याऐवजी राजेंद्र गावित यांना भाजपने उमेदवारी दिली. त्यावेळी शिवसेनेने वणगा यांना आधार दिला होता. तर, 2019 च्या विधानसभा निवडणुकीत सेनेने उमेदवारी देऊन त्यांना आमदारही केले. हेच वणगा आता बंडखोरांना साथ देत असल्याने शिवसैनिकांनी संताप व्यक्त केला आहे.