पालघर- मिरा रोड येथे भाजपकडून नवरात्र उत्सव आयोजित करण्यात आला आहे. मिरारोडच्या शांतीनगर परिसरात हा भाजप नगरसेवक दिनेश जैन यांनी आयोजीत केला आहे. मात्र, यात भाजपच्या दोन गटात तुफान राडा झाला आहे. त्यामुळे मिरा भाईंदर येथील भाजपमधील अंतर्गत कलह चव्हाट्यावर आला आहे.
हेही वाचा-जोरदार शक्तीप्रदर्शन करत आदित्य ठाकरेंचा उमेदवारी अर्ज दाखल, ठाकरे कुटुंबीय उपस्थित
महापौर डिंपल मेहता आणि माजी महापौर गीता जैन येथील कार्यक्रमात उपस्थित होत्या. यावेळी आयोजकांकडून भाजप महापौर डिंपल मेहता यांचा सत्कार करण्यात आला. मात्र, माजी महापौर गीता जैन यांचा सत्कार केला नाही. या कारणावरुन दोन्ही समर्थकांमध्ये शाब्दिक वाद सुरू झाला. त्याचे रुपांतर हाणामारीत झाले. मिरा भाईंदर शहरात भाजपमध्ये दोन गट तयार झाले आहेत. एक भाजप आमदार नरेंद्र मेहता तर दूसरा गट माजी महापौर व भाजप नगर सेविका गीता जैन यांचा आहे. नगरसेवक दिनेश जैन भाजप उमेदवार नरेंद्र मेहता यांचे समर्थक आहेत. नगरसेवक दिनेश जैन यांनी मिरा रोडच्या शांतीनगरमधील गरबाचे आयोजन केले होते. यावेळी मंडळाच्या काही सदस्यांनी माजी महापौर गीता जैनला बोलावले होत. माजी महापौर गीता जैन यांच्या समर्थकांनी गीता जैन यांचा सत्कार करण्यासाठी संचालक मंडळाकडे निवेदन केले होते. परंतु, नगरसेवक दिनेश जैन यांनी गीता जैन यांचा सत्कार करायला नकार दिला. त्यामुळे भाजपच्या दोन गटांत राडा झाला.
हेही वाचा-राज्यात भाजप व शिवसेनेच्या विरुद्ध जनतेचा मोठा क्रोध : दिलीप वळसे-पाटील
विद्यमान आमदार नरेंद्र मेहता तसेच माजी महापौर व नगरसेविका गीता जैन यांनी भाजपकडून उमेदवारीची मागणी केली होती. पक्षाने नरेंद्र मेहता यांना भाजपची उमेदवारी १४५ मिरा भाईंदर विधानसभेतून दिली आहे. गीता जैनला पक्षाने तिकीट दिले नाही. परंतु, गीता जैन अपक्ष निवडणूक लढण्याच्या तयारीत आहेत. त्यामुळे दोन गट एकमेकांच्या समोर आहेत. नगरसेवक दिनेश जैन यांची पत्नी सुनीता जैनच्या तक्रारीवरुन पूर्व महापौर गीता जैन व त्याच्या समर्थकांच्या विरोधात नयानगर पोलीस ठाण्यात गुन्हा दाखल करण्यात आला आहे. तसेच गीता जैनच्या समर्थकांनी नयानगर पोलीस ठाण्यात गुन्हा दाखल केला आहे.
