पोरबंदर, वेरावळ येथे अडकलेल्या महाराष्ट्रातील शेकडो खलाशांची होतेय गैरसोय; राज्य सरकारकडून मदतीची अपेक्षा

वेरावळ येथे अडकलेल्या खलाशांनी आपल्या नातेवाईकांना पाठवलेल्या व्हिडिओमध्ये वेरावळमध्ये आपली व्यवस्थित सोय होत नसल्याची तक्रार नोंदवली आहे. त्याचप्रमाणे नारगोळ बंदरापासून आपली गावे अवघी दोन-तीन किलोमीटरवर असताना आपल्याला तिथे उतरून न दिल्याबद्दल तीव्र शब्दांत नाराजी व्यक्त केली आहे.

पालघर - महाराष्ट्रात प्रवेश न दिल्यामुळे पोरबंदर, वेरावळ येथे शेकडो खलाशी अडकले आहेत. या सर्व खलाशांची अन्नधान्य, पाणी, मास्क अशी कोणतीही सुविधा नसल्याने प्रचंड गैरसोय होत आहे. त्यामुळे या खलाशांनी महाराष्ट्र सरकारकडे त्यांना घरी घेऊन जाण्याची तसेच सेवासुविधा पुरवण्याची विनवणी केली आहे.

हेही वाचा....ईटीव्ही भारत विशेष : राज्यातील आंबा आणि मच्छिमारी व्यवसाय संकटात

गुजरातच्या वेरावळ भागात कार्यरत असणारे सुमारे दोन हजार खलाशी 4 एप्रिल रोजी आपल्या घरी परतण्यासाठी गुजरातमधील नारगोल, उंबरगाव भागात आले होते. या खलाशांना प्रथम गुजरातमधील स्थानिकांनी तिथे उतरण्यास मज्जाव केला. त्यानंतर ५ एप्रिल रोजी गुजरातमधील १,१२२ खलाशांना उतरवून घेतल्यानंतर महाराष्ट्राच्या खलाशांना तिथे उतरण्यास गुजरातच्या प्रशासकीय विभागाने नकार दिला. महाराष्ट्र सरकारमार्फत मात्र, कोणताही आदेश न मिळाल्यामुळे नाईलाजास्तव महाराष्ट्रातील जवळपास ७०० खलाशी असणाऱ्या बोटींना वेरावळ, पोरबंदर येथे परतावे लागले.

हेही वाचा...रेल्वे सुरू करण्याबाबत अद्याप निर्णय नाही; रेल्वे मंत्रालयाचे स्पष्टीकरण..

या खलाशांनी आपल्या नातेवाईकांना पाठवलेल्या व्हिडिओमध्ये वेरावळमध्ये आपली व्यवस्थित सोय होत नसल्याची तक्रार नोंदवली आहे. त्याचप्रमाणे नारगोळ बंदरापासून आपली गावे अवघी दोन-तीन किलोमीटरवर असताना आपल्याला तिथे उतरून न दिल्याबद्दल तीव्र शब्दांत नाराजी व्यक्त केली आहे.

एकीकडे गुजरात सरकारने दुजाभावाने वागवले, तसेच तलासरी आणि डहाणू तालुक्यातील पालघर जिल्हा प्रशासनाने याबाबत आवश्यक पाठपुरावा केला नसल्याची खंत देखील ही मंडळी करत आहेत. आगामी काळात गुजरातमधील नागरिकांना आपल्या भागातील बाजारपेठेमध्ये येण्यास मज्जाव करू, अशा स्वरूपाचा इशारा वेरावळ येथे अडकून पडलेल्या खलाशांनी दिला आहे. त्यामुळे सीमावर्ती भागातील खलाशांमध्ये एकप्रकारे तणावाचे वातावरण निर्माण झाले आहे.