पालघर - जिल्ह्यातील मोखाडा तालुक्यात पावसाने कालपासून उग्ररुप धारण केल्यामुळे मोखाडा- त्र्यंबकेश्वर या मुख्य रस्त्यावरील मोरचोंडी येथील नदीला पूर आला आहे. यापुरात हा रस्ताच वाहून गेल्याने येथील वाहतूक पूर्णपणे बंद झाली आहे.
मोखाडमध्ये पावसाचे थैमान; मोखाडा- त्र्यंबकेश्वर रस्ता खचला तर शाळा, घरांमध्येही घुसले पाणी
मुसळधार पावसामुळे मोरचोंडी जिल्हा परिषद शाळा आणि अंगणवाडी परिसरात पाणी साचले आहे. तर आसपासच्या घरात पाणी घुसल्याने येथील रहिवाशांचे मोठ्या प्रमाणावर हाल होत आहेत. ही घटना पहाटे ६:३० वाजताच्या सुमारास घडल्याने सुदैवाने मोठी दुर्घटना टळली. तर मोखाडा तालुक्यात मुसळधार पावसाने थैमान घातल्यामुळे मोखाडा-त्र्यंबक रस्त्यावरील मोरचुंडी येथील पुलावरील रस्ता मोठ्या प्रमाणावर खचला आहे.