वाढवण किनारपट्टीवर तांत्रिक बिघाडामुळे अडकले जहाज

मुंबईकडून सुरतकडे रवाना होणारे जहाज तांत्रिक बिघाडामुळे रस्ता भरकटून वाढवण किनारपट्टीवर अडकून पडले आहे. किनाऱ्यालगत खडकाळ भाग असल्याने जहाजाचे काही प्रमाणात नुकसान झाले आहे.

पालघर -जिल्ह्यातील वाढवण किनारपट्टीवर एक मालवाहू जहाज आल्याने ते पाहण्यासाठी नागरिकांनी गर्दी केली आहे. हे जहाज कुठून आले याबाबत वाणगाव पोलिसांनी प्राथमिक चौकशी केली.

संबधित जहाज सुरतकडून मुंबईकडे वाहतूक करण्यासाठी निघाले होते. मुंबईतील बंदरात सामान उतरवल्यानंतर पुन्हा सुरतकडे रवाना होण्यासाठी निघाले होते. रात्री तीन वाजण्याच्या सुमारास समुद्रात वादळी वाऱ्यासह पावसाला सुरुवात झाल्याने हे जहाज मार्ग भरकटून वाढवण किनाऱ्यावर आले. किनाऱ्यालगत खडकाळ भाग असल्याने जहाजाचे काही प्रमाणात नुकसान झाले आहे. समुद्राला ओहटी लागली असल्यामुळे पाणी ओसरल्यानंतर ते खडकामध्ये अडकले. जहाजाच्या ट्रॉलरमध्ये एक कर्मचारी असून( मुंबई-घाटकोपर) त्याने सुरत येथील कार्यालयात संपर्क साधून सर्व माहिती दिली आहे. सुरतवरून ट्रोलरच्या मदतीसाठी दुसरी बोट रवाना झाल्याची माहिती मिळाली आहे.