४ कोटी रुपयांची रोकड लुटणाऱ्या आरोपींना बेड्या, कोटक महिंद्रा एटीएम व्हॅन प्रकरण

गेल्या आठवड्यात गुरुवार १२ नोव्हेंबरला लुटीची ही घटना घडली होती. आरोपी चालक हा ४ कोटी २५ लाखांची रक्कम घेऊन पसार झाला होता. याप्रकरणी तीन आरोपींना पकडण्यात पोलिसांना यश आले आहे. पोलिसांनी या गुन्ह्यातील ४ कोटी २३ लाख २९ हजारांची रक्कम जप्त केली आहे.

पालघर/विरार - सव्वाचार कोटींची रोख रक्कम असलेली व्हॅन घेऊन पळालेल्या गुन्ह्याचा अखेर उलगडा झाला आहे. याप्रकरणी तीन आरोपींना पकडण्यात पोलिसांना यश आले आहे. पोलिसांनी या गुन्ह्यातील ४ कोटी २३ लाख २९ हजारांची रक्कम जप्त केली आहे. आरोपींनी त्या रकमेतून विकत घेतलेली बुलेट, मोबाईलही पोलिसांनी जप्त केले आहेत. पकडलेल्या आरोपींना २५ नोव्हेंबरपर्यंत पोलीस कोठडी सुनावण्यात आली आहे. आरोपींनी गांजा पिताना या चोरीची योजना आखल्याचे पोलीस तपासात समोर आले आहे.

काय आहे एटीएम व्हॅन प्रकरण?

गेल्या आठवड्यात गुरुवार १२ नोव्हेंबर रोजी लुटीची ही घटना घडली होती. विरार पश्चिमेच्या बोळींज येथे असलेल्या महिंद्रा कोटक बँकेच्या एटीएममध्ये रोकड भरण्यासाठी रायटर बिझनेस या कंपनीची व्हॅन आली होती. यात दोन सुरक्षारक्षक आणि एक मदतनीस होता. यावेळी एटीएम सेंटर जवळ व्हॅन उभी असताना सुरक्षा रक्षक आणि मदतनीस एटीएम मशीन उघडण्यास व्यस्त असताना व्हॅनचा चालक रोहीत आरू (२६) हा दोघांना चकमा देत व्हॅन घेऊन पळाला होता. या व्हॅनमध्ये ४ कोटी २५ लाख रुपये एवढी रोख रक्कम होती. आरोपीच्या शोधासाठी अर्नाळा सागरी पोलिसांची ५ पथके तसेच गुन्हे शाखा स्वतंत्रपणे तपास करत होती.

व्हॅनमधील रोकड घेऊन असे झाले पसार -

आरोपीने पळवून नेलेली व्हॅन भिवंडी येथे सापडली होती. त्यात २ कोटी ३३ लाख रुपये होते. आरोपीची ओळख होती. मात्र, त्याचा फोन भिवंडी येथेच बंद झाल्याने पोलिसांना तपास करताना अडचणी आल्या होत्या. पोलिसांनी आरोपीच्या मोबाईल फोनचा सीडीआर काढून संशयास्पद नंबर शोधले आणि तपास चालू केला. त्यानंतर अक्षय मोहिते याचा तपास करून त्याला चेंबूर येथून ताब्यात घेतले. मुख्य आरोपी रोहीत अहमदनगर येथे गेल्याचे समजताच पोलिसांनी त्याच्या मुसक्या आवळल्या. ही रक्कम त्याने चंद्रकांत उर्फ बाबूशा गायकवाड (४१) याच्याकडे ठेवायला दिली होती. पोलिसांनी त्यालाही अटक करून सर्व रक्कम जप्त केली.

हेही वाचा -ठाण्यात सराफा दुकानावर भरदिवसा सशस्त्र दरोडा, ९ लाख ७६ हजाराचा ऐवज घेऊन चोरटे पसार

चोरीच्या पैशांची सात दिवसांत उधळपट्टी -
आरोपी रोहीत मारू याने त्याचा मित्र अक्षय मोहिते याच्यासह एकत्र गांजा पिताना ही चोरीची योजना आखली होती. पोलिसांना चकमा देण्यासाठी त्याने मोबाईल फोन फेकून दिला होता. मात्र, पोलिसांनी तांत्रिक पुराव्याच्या आधारे सर्व आरोपींना अटक केली. आरोपीने तीन लाख रुपये खर्च केले होते. त्यात सेकंड हॅंड बुलेट विकत घेतली होती. ती सुध्दा पोलिसांनी जप्त केली आहे. पोलीस उपायुक्त संजय पाटील यांच्या मार्गदर्शनाखाली अर्नाळा सागरी पोलीस ठाण्याचे वरिष्ठ पोलीस निरीक्षक महेश शेट्ये, गुन्हे शाखेच्या काशिमिरा युनिटचे प्रमुख पोलीस निरीक्षक प्रमोद बडाख, पोलीस हवालदार अर्जुन जाधव अशोक पाटील, पुष्पेंद्र पाटील, संजय शिंदे, मनोज चव्हाण आदींच्या पथकाने कारवाई करून आरोपींना अटक करण्यात यश मिळवले आहे.

२५ नोव्हेंबरपर्यंत पोलीस कोठडी; रकमेसह मुद्देमाल जप्त
पोलिसांनी तिन्ही आरोपींकडून ४ कोटी २८ लाख ७० हजार १०० रुपयांची रोख रक्कम, १ लाख ४० हजारांचा मोबाईल असा मुद्देमाल जप्त केला आहे. तिन्ही आरोपींना वसई न्यायालयात बुधवारी हजर केल्यावर 25 नोव्हेंबरपर्यंत पोलीस कोठडी सुनावण्यात आली आहे.

हेही वाचा -दीड वर्षापासून फरार चोरट्याला अटक; २० लाखाचे दागिने जप्त