उस्मानाबाद -अखिल भारतीय मराठी साहित्य संमेलनाच्या मंचावर राजकारण्यांना स्थान असणार नाही, असे ठरले होते. त्यानुसार सांस्कृतिक मंत्री अमित देशमुख कार्यक्रमाला उपस्थित असताना देखील त्यांना मंचावर बसवले नाही. मात्र, या राजकारण्यांप्रमाणेच प्रशासकीय अधिकाऱ्यांना देखील मंचावर बसवू नये, अशी मागणी साहित्यकार करीत आहेत.
मराठी साहित्य संमेलन म्हटले की, वाद आणि प्रतिवाद आलेच. मात्र, हे वादाचे समीकरण अद्यापही कायम आहे. साहित्य संमलेनामध्ये फादर फ्रान्सिस दिब्रिटो यांच्या नावाने सुरू झालेला वाद हा नुकताच शांत झाला. त्यानंतर राजकारण्यांना मंचावर स्थान देऊ नका, अशी मागणी जोर धरत होती. त्यानुसार साहित्य संमेलनाच्या उद्घाटन समारंभात सांस्कृतिक मंत्री अमित देशमुख यांना कार्यक्रमासाठी निमंत्रित केले. मात्र, त्यांना स्टेजवर बोलावण्यात आले नाही. याबाबतीत साहित्यिकांमध्ये समाधान असले तरी जिल्हाधिकारी दीपा मुधोळ मुंडे आणि मुख्य कार्यकारी अधिकारी संजय कोलते हे सभामंडपामध्ये कार्यक्रमाच्या मंचावर उपस्थित होते. त्यामुळे या मंचावर फक्त साहित्यिक असायला हवे, अशी मागणी साहित्यकार करीत आहेत. त्यामुळे या साहित्य संमेलनामध्ये हा नवीन वाद उद्भवण्याची शक्यता आहे.
हे वाचलं का? - साहित्य संमेलन : कवी कट्ट्यात मांडल्या शेतकऱ्यांच्या व्यथा अन भ्रष्ट व्यवस्थेचे दर्शन