नाशिक : वातावरणातील बदलामुळे जिल्ह्यात तापाची साथ

हवामानात अचानक बदल झाल्याने नागरिकांच्या आरोग्यावर विपरीत परिणाम होत आहे. नाशिक शहर व जिल्ह्यात व्हायरल तापाने आजारी पडलेल्या रुग्णांच्या संख्येत तब्बल 70 टक्क्यांनी वाढ झाली आहे.

नाशिक - हवामानात अचानक बदल झाल्याने नागरिकांच्या आरोग्यावर विपरीत परिणाम होत आहे. नाशिक शहर व जिल्ह्यात व्हायरल तापाने आजारी पडलेल्या रुग्णांच्या संख्येत तब्बल 70 टक्क्यांनी वाढ झाली आहे.

गेल्या आठ दिवसांपासून पावसाने पाठ फिरवल्याने वातावरणात अचानक बदलले आहे. कधी ढगाळ वातावरण, तर मध्येच तापमान 37 ते 38 अंशांपर्यंत वाढत असल्याने उष्णता जाणवत आहे. तसेच रात्री आणि पहाटे हवेत गारवा असल्याने याचा थेट परिणाम नागरिकांच्या आरोग्यावर होत आहे. यामुळे ताप, सर्दी, खोकला, अंगदुखी इ. साथीच्या आजारांच्या रुग्णसंख्येत मोठ्या प्रमाणात वाढ झाली आहे.

वातावरणातील बदलामुळे रुग्णालयात तरुणांची संख्या वाढत आहे, असे डॉक्टरांनी सांगितले. तसेच घाबरून न जाता योग्य वैद्यकीय सल्ला घ्यावा, असे आवाहन डॉक्टरांनी केले आहे.

जिल्हा शासकीय रुग्णालयात रुग्णांची संख्या मोठ्या प्रमाणात वाढत असून, बाह्यरुग्ण विभागात रोज जवळपास 390 रुग्ण प्रथमोपचारासाठी येत आहेत. सध्या हा आकडा 500 पर्यंत गेला आहे. खाजगी रुग्णालयातही अशीच परिस्थिती असल्याने सर्वत्र भीतीचे वातावरण आहे. जिल्ह्यात अनेक ठिकाणी डेंग्यूचे रुग्णही आढळले आहेत.

#कोणती काळजी घ्याल..

पावसाळ्यात बाहेरील खाद्यपदार्थ खाऊ नये, ताप आल्यास घरी आराम करावा, गर्दीमध्ये जाणे टाळावे, पाणी उकळून प्यावे, ताप, खोकला, अंगदुखी झाल्यास तात्काळ डॉक्टरांच्या सल्ल्याने उपचार घ्यावेत.