नाशकात पोलीस अधीक्षकांच्या बंगल्यात शिरले चोर, चंदनाची झाडे तोडली

थेट ग्रामीण पोलीस अधीक्षकांच्या बंगल्यावरच मोर्चा वळविल्याने नाशिक शहरात एकच खळबळ उडाली आहे. चोरट्यांनी बंगल्याच्या आवारातील तीन मोठी चंदनाची झाडं तोडल्याचा धक्कादायक प्रकार गुरुवारी मध्यरात्री घडला.

नाशिक - शहरामध्ये सर्वसामान्य नागरिकांच्या घरी होणाऱया चोरींच्या प्रकारात वाढ होत आहे. पण आता चोरट्यांनी थेट ग्रामीण पोलीस अधीक्षकांच्या बंगल्यावरच मोर्चा वळविल्याने शहरात एकच खळबळ उडाली आहे. चोरट्यांनी बंगल्याच्या आवारातील तीन मोठी चंदनाची झाडं तोडल्याचा धक्कादायक प्रकार गुरुवारी मध्यरात्री घडला. याबाबत सरकारवाडा पोलीस ठाण्यात गुन्हा दाखल करण्यात आला आहे.

पोलीस अधीक्षक आरती सिंह यांच्या निवासस्थानी पोलिसांच्या सुरक्षेला छेद देत चोरांनी थेट बंगल्यात प्रवेश केला. इलेक्ट्रिकल कटरच्या सहाय्याने चंदनाची तीन झाडे जमीनदोस्त केली व झाडामधील चंदनाचे दोन ओडके चोरून नेले. बाजारात या दोन झाडांची किंमत लाखाच्या घरात आहे. शहर पोलिसांच्या हद्दीत ग्रामीण पोलीस अधीक्षकांसह, जिल्हाधिकारी ,जिल्हा व सत्र जिल्हा न्यायाधीशांच्या सह अनेक वरिष्ठ अधिकाऱ्यांची निवासस्थान आहेत. या सर्व निवासस्थानामध्ये पोलिस अधीक्षकांच्या बंगला शहराच्या मध्यवर्ती भागात आहे. चारही बाजूने पोलिसांचे सुरक्षा कवच असलेल्या बंगल्याच्या आवारात चंदन चोरांनी प्रवेश करत चंदन चोरी केल्याने शहर पोलिसांच्या सुरक्षेला एक प्रकारे सुरुंग लावण्याचे बोलले जाते आहे. या आधी देखील शासकीय निवासस्थानी मध्ये असलेल्या चंदनाच्या झाडांना चोरट्यानी लक्ष केले होते. यापूर्वी जिल्हा व सत्र न्यायाधीश, बांधकाम अभियंता ,जिल्हाधिकारी निवासस्थान, मुख्य कार्यकारी अधिकारी यांच्या निवासस्थानाच्या परिसरातून चंदनाचे झाडे चोरी गेल्याची नोंद पोलीस ठाण्यात करण्यात आली आहे.