नाशिक- वाहनधारकांची कागदपत्रे, परवाने, पीयूसी तसेच हेल्मेट तपासणी करणे हे काम परिवहन विभागाचे (आरटीओ) आहे. त्यामुळे, यापुढे हा विभागच कागदपत्रांची तपासणी करेल. वाहतूक पोलीस हे फक्त वाहतूक कोंडी सोडवण्याचे काम करेल. ते दंडाच्या स्वरुपातील महसूल गोळा करणार नाही. ते काम पोलिसांचे नाही, असे स्पष्ट आदेश पोलीस आयुक्त दीपक पाण्डेय यांनी दिले आहेत.
जिल्हाधिकारी कार्यालयात आज जिल्हाधिकारी, पोलीस आयुक्त, पोलीस अधीक्षक, राज्य उत्पादन शुल्क आणि प्रादेशिक परिवहन विभाग यांची अवैध धंद्यांबाबत संयुक्त कारवाई करण्यासंदर्भात बैठक झाली. यात बोलताना पोलीस आयुक्त पाण्डेय यांनी ही माहिती दिली. शहरातील वाहतुकीची होणारी कोंडी फोडणे हे मुख्य काम वाहतूक पोलिसांचे आहे. पण, पोलीस कोंडी होत असतानाही अनेकदा दंड वसूल करण्यावर लक्ष देतात. असे वारंवार निदर्शनास येते. वाहनधारकाला दंड करून तो महसूल जमा करणे हे पोलिसांचे काम नाही. यापूर्वी तसे काम होत होते. पोलिसांना महसूल वसुलीचे टार्गेट देण्यात येत होते. पण, आता पोलिसांना असे कोणत्याही प्रकारचे टार्गेट दिले जाणार नाही, असे पोलीस आयुक्त दीपक पाण्डेय म्हणाले.