नाशिक -शहरात घरोघरी शुक्रवारपासून श्रीकृष्ण जन्माष्टमी धूम दिसून येत आहे. कृष्णावरील गाणे, भजन, गवळणीच्या कार्यक्रमाचे आयोजन करण्यात आले होते. अनेक गोविंदा मंडळांकडून आज शनिवारी गोपाळकाल्यानिमित्त ठिकठिकाणी दहीहंडी फोडण्यात येणार आहे.
गोविंदा आला रे आला...राज्यभर दहीहंडीचा उत्सव, जाणून घ्या गोपाळकाल्याचे महत्व नाशिक येथील नारायणी भजनी मंडळाच्यावतीने आयोजित एका कार्यक्रमात श्रीकृष्णाची लीला सांगणाऱ्या गवळणी सादर करण्यात आल्या. 'पैंजनाचा नाद आला गोड कानी गं, कृष्ण सावळा देव सावळा, रात्र काळी घागर काळी, राधे तुला, पाण्या निघाली गौळण, हरी तू आमुचा रे सवंगडी अशा अनेक गवळणी सादर करून श्रीकृष्णाच्या लीला सांगण्यात आल्या. यावेळी घराघरात श्रीकृष्णाची आरास साकारण्यात आली होती. तसेच जन्माष्टमीच्यानिमित्त श्रीकृष्ण मंदिरात भाविकांची गर्दी होती.
श्रीकृष्ण जन्माष्टमी -
श्रीकृष्ण जन्माष्टमीलाच गोकुळाष्टमी म्हणतात. यादिवशी कंसाच्या बंदीशाळेत वासुदेव आणि देवकीच्या पोटी कृष्णाचा जन्म झाला होता. त्यानंतर यशोदाने गोकुळात नेऊन त्याचा सांभाळ केला. त्यामुळे मथुरा, वृंदावन, द्वारका, तसेच मध्य भारतात आणि महाराष्ट्रात देखील हा जन्माष्टमी मोठ्या उत्साहाने साजरा करतात.
गोपाळकाला काय असतो?
गोपाल म्हणजे गायींचे पालन करणाऱ्या कृष्णाच्या जन्मोत्सवानिमित्ताने काल्याचा प्रसाद केला जातो. त्यामुळे त्याला गोपालकाला म्हणतात. त्यामध्ये पोहे, ज्वारीच्या लाह्या, धानाच्या लाह्या, लिंबू व आंब्याचे लोणचे, दही, ताक, चण्याची भिजविलेली डाळ, साखर, फळांचे तुकडे आदी पदार्थ टाकून दहीकाला तयार केला जातो. हा दहीकाला कृष्णाला अधिक प्रिय होता, असे मानले जाते. महाराष्ट्रात या दहीकाल्याचे सेवन करून दुसऱ्या दिवशी उपवास सोडला जातो.
गोविंदा आला रे आला...
महाराष्ट्रात विशेषत: मुंबईत दही-दुधाने भरलेला मडके उंचावर लटकवले जाते. त्यानंतर मानवी मनोरा तयार केला जातो आणि ती दहीहंडी फोडण्यासाठी गोविंदांची स्पर्धा सुरू होते. यावेळी गोविंदा आला रे आला...असे गाणं म्हणत सर्वजण दहीहंडी उत्सव साजरा करीत असतात.
