2 सप्टेंबरला राणे हजर न राहिल्यास पुढील कारवाई करू; नाशिक पोलीस आयुक्तांची माहिती

नाशिकच्या सायबर पोलीस ठाण्यात केंद्रीय मंत्री नारायण राणे यांच्या विरोधात गुन्हा दाखल करण्यात आला आहे. या प्रकरणात राणे यांना आपली बाजू मांडण्यासाठी आम्ही 2 सप्टेंबर रोजी नाशिक पोलीस ठाण्यात बोलवले आहे. याबाबत राणेंनी देखील पोलिसांना सहकार्य करण्याची भूमिका दाखवत मी येतो म्हणून सांगितले आहे. जर नोटीस देऊनही राणे हजर न झाल्यास पुढील कारवाई करू, असे पोलीस आयुक्त दीपक पांडये यांनी म्हटले आहे.

नाशिक -मुख्यमंत्री उद्धव ठाकरे यांच्याबाबत आक्षेपार्ह वक्तव्यावरून केंद्रीय मंत्री नारायण राणे यांच्याविरोधात नाशिक सायबर पोलीसात गुन्हा दाखल करण्यात आला आहे. याबाबत 2 सप्टेंबरला केंद्रीय मंत्री नारायण राणे यांना नाशिकमध्ये हजर राहण्याची नोटीस नाशिक पोलिसांनी नारायण राणे यांना दिली आहे. नारायण राणे हजर न राहिल्यास पुढची कारवाई केली जाईल असे पोलीस आयुक्त दीपक पांडये यांनी म्हटले आहे.

मुख्यमंत्री आणि पोलीस आयुक्तांची रणनिती -

केंद्रीय मंत्र्याला अटक होत नाही असा केंद्रीय मंत्री नारायण यांसह भाजपाच्या नेत्यांचा गैरसमज महाराष्ट्र पोलिसांनी दूर केला आहे. यामागे दोन व्यक्ती आहेत. एक मुख्यमंत्री उद्धव ठाकरे आणि पडद्यामागून हे अशक्य असलेलं शक्य करून दाखवणारे नाशिकचे पोलीस आयुक्त दीपक पांडे. केंद्रीय मंत्री नारायण राणे यांनी उद्धव ठाकरे यांच्याबाबत असभ्य भाषेचा वापर केल्यावर त्यांच्यावर कारवाई झालीच पाहिजे, असे शिवसेनेला वाटतं होते. त्यावर सोमवारी रात्रभर चर्चा होत त्याला होकार मिळाला. मात्र कारवाई कोण करणार असा प्रश्न होता? राज्यातील बहुतांश पोलीस अधिकाऱ्यांनी या विषयापासून लांब राहणेच पसंत केले. मात्र नाशिकचे पोलीस आयुक्त यांनी यातील तरतुदींचा बारीक अभ्यास करून मार्ग काढला. कारवाईआधी शिवसेनेचे महानगरप्रमुख सुधाकर बडगुजर यांची तक्रार घेण्यात आली. शिवसेनेच्या अन्य मोठ्या नेत्यांचे जबाब नोंदविण्यात आले आणि नारायण राणे विरोधात भा.द. वि. कलम 500, 502, 505, 153 (अ) अंतर्गत गुन्हे दाखल करण्यात आले. या कायद्यात राणेंच्या विधानाने समाजात द्वेष, तेढ निर्माण होऊ शकते तसेच कायदा-सुव्यवस्थेचा प्रश्न निर्माण होऊ शकतो, अशा आशयाची तक्रार दाखल करण्यात आली.

जामीनानंतर नोटीस देता येते का?

मुख्यमंत्र्यांवर टीका केल्यामुळे केंद्रीय मंत्री नारायण राणे यांच्याविरोधात नाशिक आणि महाडमध्ये गुन्हा दाखल करण्यात आला होता. महाड पोलिसांनी नारायण राणे यांना अटक करत कोर्टात हजर केले. कोर्टाने त्यांना जामीनही मंजूर केला. अशात नाशिक पोलीस देखील याठिकाणी नारायण राणेंना अटक करण्यासाठी गेले होते. राणे यांना जामीन मिळाल्यानंतर नाशिक पोलिसांनी नाशिकमध्ये दाखल गुन्ह्याअंतर्गत नारायण राणे यांना पोलीस ठाण्यात हजर होण्याची नोटीस काढली. अशा गुन्ह्यात पोलीस संशयित व्यक्तीला चौकशीसाठी नोटीस देऊ शकते, असे अॅड. धर्मेंद्र चव्हाण यांनी म्हटले आहे. नोटीस देऊन सुद्धा व्यक्ती त्या तारखेला हजर झाली नाही तर वॉरंट काढून अटक करण्याचे अधिकार देखील कायद्यात असल्याचे चव्हाण यांनी सांगितले.

राणे तपासात सहकार्य करतील -

नाशिकच्या सायबर पोलीस ठाण्यात केंद्रीय मंत्री नारायण राणे यांच्या विरोधात गुन्हा दाखल करण्यात आला आहे. या प्रकरणात राणे यांना आपली बाजू मांडण्यासाठी आम्ही 2 सप्टेंबर रोजी नाशिक पोलीस ठाण्यात बोलवले आहे. याबाबत राणेंनी देखील पोलिसांना सहकार्य करण्याची भूमिका दाखवत मी येतो म्हणून सांगितले आहे. जर नोटीस देऊनही राणे हजर न झाल्यास पुढील कारवाई करू, असे पोलीस आयुक्त दीपक पांडये यांनी म्हटले आहे.