नाशकात एटीएम चोरीचा सिनेस्टाईल थरार; दोघांना अटक

मागील काही दिवसांपासून नाशिक शहरासह जिल्ह्यातील ग्रामीण भागात एटीएम चोरीच्या धाडसी घटना घडत आहेत. मंगळवारी पुन्हा असाच एक एटीएम चोरीचा थरार नाशिकमध्ये घडला. गस्तीवर असलेल्या पोलिसांच्या पथकाने सिनेस्टाईल पद्धतीने चोरांचा पाठलाग करत अटक केली.

नाशिक - एटीएम चोरी करणाऱ्या चोरांचा गस्तीवर असलेल्या पोलिसांच्या पथकाने सिनेस्टाईल पद्धतीने पाठलाग करत अटक केली. नाशिक शहरातील सातपूर परिसरात ही घटना घडली. नाशिक पोलिसांच्या या कारवाईचे कौतुक होत आहे.

मागील काही दिवसांपासून नाशिक शहरासह जिल्ह्यातील ग्रामीण भागात एटीएम चोरीच्या धाडसी घटना घडत आहेत. मंगळवारी पुन्हा असाच एक एटीएम चोरीचा थरार नाशिकमध्ये घडला. सातपूरच्या पपया नर्सरी परिसरात असलेल्या आयसीआयसीआय बँकेचे एटीएम सहा जणांच्या टोळीने यशस्वीपणे उचलेले. मात्र, हे एटीएम मशीन वाहनात टाकत असताना गस्तीवर असलेल्या पोलीस पथकाच्या ही बाब लक्षात आली. त्यानंतर चोरांनी एटीएम सोडून पळ काढला.

हेही वाचा - अतिवृष्टीमुळे कांदा उत्पादन घटले; देशभरात भाव वाढणार?

पहाटेच्या दरम्यान घडलेल्या या घटनेनंतर नाशिक शहर पोलिसांच्या 5 ते 6 पोलीस ठाण्यातील कर्मचाऱ्यांनी शहरात नाका बंदी केली. त्यामुळे चोरांना शहरातून पळ काढण्यात अपयश आले. हा चोर-पोलिसांचा खेळ शहरात 3 ते 4 तास सुरू होता. अखेर सिनेस्टाईल पद्धतीने पोलिसांनी एटीएम चोरांना पकडले. पकडलेल्या आरोपींच्या चौकशीनंतर त्यांच्याकडून पालघर आणि मोखाडा परिसरातील दरोड्याच्या घटनेची देखील उकल झाली. दरम्यान, चोरीच्या घटनेचा संपूर्ण थरार सीसीटीव्ही कॅमेऱ्यात कैद झाला.