नाशिक येथील कबड्डी-प्रो स्पर्धेत शिवशक्ती स्पोर्ट क्लब विजयी

पुणेरी पलटण आणि नाशिक कबड्डी असोसिएशन यांच्या संयुक्त विद्यमाने आयोजित केलेल्या कबड्डी प्रो स्पर्धेताल अंतिम फेरीमध्ये झालेल्या अटीतटीच्या सामन्यात नाशिकच्याच शिवशक्ती स्पोर्ट क्लब आडगाव या संघाने बाजी मारली आहे.

नाशिक -पुणेरी पलटण आणि नाशिक कबड्डी असोसिएशनच्या वतीने नाशिकमध्ये झालेल्या कबड्डी प्रो स्पर्धेत शिवशक्ती स्पोर्ट क्लब हा संघ विजयी ठरला आहे. अंतिम सामन्यामध्ये नाशिकच्याच शिवशक्ती स्पोर्ट क्लब आडगाव संघाने ब्रम्हा स्पोर्ट्स संघावर १८ विरुद्ध १६ अशी मात करत विजेतेपद पटकावले.

या कबड्डी स्पर्धेमध्ये 24 संघांनी सहभाग नोंदविला होता. एकूण 288 खेळाडूंनी या स्पर्धेत सहभाग घेतला होता. ग्रामीण भागातील खेळाडूंना अद्यावत साधने व योग्य मार्गदर्शन मिळावे यासाठी नाशिकमध्ये हे कबड्डी सामने सुरू केले असल्याचे क्रीडाशिक्षक प्रशांत भाबड यांनी सांगितले आहे.

या स्पर्धेचे उद्घाटन नाशिक शहर भारतीय जनता पार्टीचे अध्यक्ष गिरीष पालवे यांच्या हस्ते करण्यात आले होते. कार्यक्रमाच्या अध्यक्षस्थानी नाशिक विभागाचे क्रीडा उपसंचालक चंद्रकांत कांबळे हे उपस्थित होते, तर प्रमुख पाहुणे म्हणून शिवछत्रपती पुरस्कार विजेते नरेंद्र छाजेड, अविनाश खैरनार, आंतरराष्ट्रीय कबड्डी प्रशिक्षिका शैलजा जैन, तालुका क्रीडा अधिकारी गीता साखरे उपस्थित होते.