नाशिक - सांस्कृतिक आणि धार्मिक क्षेत्रामुळे नाशिकची ओळख ही संपूर्ण देशात पोहोचली आहे. मात्र, आता महाराष्ट्र पर्यटन विकास महामंडळाने नाशिकच्या मिसळचा स्वाद जबरदस्त असल्याचे ट्विट रविवारी सकाळी केले आहे. तसेच नाशिकने कामगिरी केल्याचाही उल्लेख त्यांनी केला आहे. त्यामुळे नाशिकच्या ओळखीत आणखी भर पडली असून मिसळ खवय्यांमध्ये आनंदाचे वातावरण आहे.
वाईन कॅपीटल म्हणून नाशिकची ओळख साता समुद्रापार पोहोचली आहे. तसेच धार्मिक नगरी म्हणून देखील नाशिकची ओळख आहे. आता झणझणीत मिसळीमुळे नाशिकच्या ओळखीत आणखी भर पडणार आहे.
पुणे आणि कोल्हापुरी मिसळीने आपले स्थान तयार केले असले, तरी नाशिकच्या झणझणीत आणि चटकदार मिसळीचा ठसका काही वेगळाच असतो. आजकाल शहरात येणाऱ्या कुठल्याही पर्यटकाची किंवा प्रवाशांची नाश्त्यासाठी पहिली पसंती मिसळलाच असते. कृषी पर्यटन केंद्रातही मिसळचीच चलती आहे. आता महाराष्ट्र पर्यटन विकास महामंडळाने मिसळचे कौतुक केल्याने नाशकातील मिसळ विक्रेत्यांमध्ये आनंदाचे वातावरण आहे. मात्र, कोल्हापूरची झणझणीत मिसळ आणि नाशकाच्या तर्रीदार मिसळ यांपैकी कोणती मिसळ खवैय्यांच्या मनावर वर्चस्व गाजवते, हे येत्या काळात समजेलच.
