कोव्हिड रुग्णालयात कर्तव्य बजावून परतलेल्या डॉक्टरांचे स्वागत

कोरोनामुक्त भारत करण्यासाठी वैद्यकीय क्षेत्रातील अनेक योद्धे आपल्या जीवाची बाजी लावून आपले कर्तव्य बजावत आहे. त्यांना प्रोत्साहन मिळावे म्हणून ते कार्यरत असलेल्या व राहत असलेल्या ठिकाणचे नागरीक व सहकारी त्यांचे जोरदार स्वागत करत आहेत.

मनमाड -डॉ. मोहन वारके हे 15 दिवस मालेगाव येथे कोरोना रुग्णालयात कर्तव्य बजावून परतल्यानंतर त्यांचे मनमाड उपजिल्हा रुग्णालयात स्वागत करण्यात आले. येथील सर्व डॉक्टर, नर्स, वॉर्ड बॉय या सर्वांनी तसेच रुग्णालयात आलेल्या नागरिकांनी टाळ्या वाजवत त्यांचे स्वागत केले.

जिल्ह्यात कोरोनाचा वाढता कहर पाहता जिल्ह्यातील शासकीय रुग्णालयात असलेले वैद्यकीय अधिकारी यांची मालेगाव व नाशिक येथील कोव्हिड रुग्णालयात ड्युटी लावण्यात आली आहे. यामध्ये १५ दिवस काम आणि त्यानंतर १४ दिवस होम क्वारंटाईन, अशाप्रकारे सेवा बजावली जात आहे. असेच मनमाड उपजिहा रुग्णालयातील डॉ. मोहन वारके यांनी मालेगाव येथील जीवन रुग्णालयात 15 दिवस कर्तव्य व 14 दिवस क्वारंटाईन होऊन आज पुन्हा आपल्या रुग्णालयात कर्तव्यावर हजर झाले. मनमाड उपजिल्हा रुग्णालयात आल्यानंतर येथील मुख्य वैद्यकीय अधिकारी डॉ. जी. एस. नरवणे यांनी त्यांचे पुष्पहार घालून स्वागत केले, तर येथील सर्व डॉक्टर, नर्स व वॉर्डबॉय यांच्यासह उपस्थित नागरिकांनी देखील डॉ. वारके यांच्यावर पुष्पवृष्टी करत व टाळ्या वाजवत स्वागत केले.

कोविड रुग्णालयात कर्तव्य बजावून परतलेल्या डॉक्टरांचे स्वागत