नाशिक : डिसेंबर अखेरपर्यंत कांद्याचे भाव जैसै थे?

ऑक्टोबर महिन्यात झालेल्या अवकाळी पावसामुळे नाशिक जिल्ह्यातील इतर पिकांसोबत कांदा पिकाचे मोठे नुकसान झाले आहे. साठवून ठेवलेला उन्हाळी कांदादेखील संपत आला आहे. नवीन लाल कांदा बाजार पेठेत मुबलक प्रमाणात येण्यासाठी जानेवारीचा पहिला आठवडा उजाडणार असल्याचे कृषी अधिकाऱ्यांनी स्पष्ट केले आहे.

नाशिक -आशिया खंडातील सर्वात मोठी कांद्याची बाजारपेठ म्हणून नाशिक जिल्ह्याची ओळख आहे. यंदा आवक घटल्याने किरकोळ बाजारात कांद्याला 150 रुपये प्रति कीलो इतका उच्चांकी दर मिळत आहे. अवकाळी पावसामुळे कांदा उत्पादनात घट झाली आहे. आवक आणि मागणी यांच्यात मोठी तफावत असल्याने कांदा दर वाढले आहेत. तरी डिसेंबर अखेरपर्यंत हे दर असेच राहण्याची शक्यता वर्तवली जात आहे.

ऑक्टोबर महिन्यात झालेल्या अवकाळी पावसामुळे नाशिक जिल्ह्यातील इतर पिकांसोबत कांदा पिकाचे मोठे नुकसान झाले आहे. साठवून ठेवलेला उन्हाळी कांदादेखील संपत आला आहे. नवीन लाल कांदा बाजार पेठेत मुबलक प्रमाणात येण्यासाठी जानेवारीचा पहिला आठवडा उजाडणार असल्याचे कृषी अधिकाऱ्यांनी स्पष्ट केले आहे. दर जास्त असले तरी त्याचा फायदा मोजक्याच शेतकऱ्यांना होताना दिसून येत आहे. भाव वाढीचा जास्त फायदा किरकोळ कांदा विक्रेते आणि व्यापारी घेत आहेत.

हेही वाचा -कांदा आयातीचा निर्णय देशातील शेतकऱ्यांना खड्ड्यात घालणारा - राजू शेट्टी

दरवर्षी सुमारे 20 ते 25 लाख टन कांद्याची भारतातून निर्यात होत असते. मात्र यंदा देशांतर्गत बाजारातच कांद्याचा पुरेसा पुरवठा होत नसल्याने केंद्र सरकारने निर्यात बंदी घातली आहे. शिवाय शासनाकडे नाफेडच्या माध्यमातून खरेदी करून ठेवलेला कांदा खराब झाल्याने तोही बाजारात आणता आलेला नाही. दरम्यान, केंद्र सरकारने ईजिप्त आणि तुर्कीमधून कांद्याची आयात करण्याचा निर्णय घेतला आहे. आयात केलेला कांदा आल्यावर काही प्रमाणात भाव कमी होतील, अशी अपेक्षा व्यक्त केली जात आहे.

जिल्ह्यातील कांदा लागवड

2018-19 मध्ये रब्बी हंगामाचे लागवड क्षेत्र 88 हजार 540 हेक्‍टर इतके होते. गेल्या वर्षीच्या तुलनेत यंदा 40 टक्के कमी लागवड झाली. जुलै ते नोव्हेंबर 2019 अखेर 10.82 मेट्रिक टन कांद्याची विक्री झाली आहे. यात जून ते नोव्हेंबर अखेरपर्यंत सर्वाधिक साठवणुकीतील कांदा विक्री झाल्याचे कृषी विभागाने सांगितले आहे.