माजी आमदार मौलाना मुफ्तींसह २० नगरसेवकांनी दिली राष्ट्रवादीला सोडचिट्ठी

तिहेरी तलाकच्या मुद्द्यावर नाराज होऊन, माजी आमदार मौलाना मुफ्ती इस्माईल यांनी वीस नगरसेवकांसमवेत राष्ट्रवादी काँग्रेसला सोडचिट्ठी दिली. २० नगरसेवकांसह, माजी महापौर हाजी नॅशनलवाले आदी समर्थकांनीही राष्ट्रवादी काँग्रेसमधून बाहेर पडण्याचा निर्णय घेतला आहे.

नाशिक -लोकसभा व राज्यसभेत तिहेरी तलाक कायदा मंजूर झाला आहे. राज्यसभेमध्ये राष्ट्रवादीचे खासदार असूनही ते चर्चेप्रसंगी गैरहजर राहिले. राष्ट्रवादीच्या खासदारांनी कोणत्याच प्रकारे विधेयकाला विरोध दर्शवला नाही. त्यामुळे तिहेरी तलाकच्या मुद्द्यावर नाराज होऊन, माजी आमदार मौलाना मुफ्ती इस्माईल यांनी वीस नगरसेवकांसमवेत राष्ट्रवादी काँग्रेसला सोडचिट्ठी दिली.

हज यात्रेला जाण्यापूर्वी त्यांनी आज (शुक्रवार) पत्रकार परिषद घेत ही घोषणा केली. सध्या मुफ्ती राष्ट्रवादीच्या शहराध्यक्षपदावर होते. त्यांच्या नेतृत्वाखाली २० नगरसेवक निवडून आले होते. त्यांनी जनता दलाशी घरोबा करत मालेगाव महागठबंधन आघाडी केली होती. २० नगरसेवकांसह, माजी महापौर हाजी नॅशनलवाले आदी समर्थकांनीही राष्ट्रवादी काँग्रेसमधून बाहेर पडण्याचा निर्णय घेतला आहे.राष्ट्रवादीला सोडचिठ्ठी देऊन तुम्ही एमआयएम पक्षात जाणार का? या प्रश्नाला उत्तर देताना मौलाना मुफ्ती म्हणाले, एमआयएमचे वरिष्ठ नेते माझ्या संपर्कात असले, तरी त्याविषयी कोणताही निर्णय घेतलेला नाही. हज यात्रेवरुन परतल्यानंतरच कार्यकर्त्यांशी चर्चा करुन आगामी भूमिका ठरविण्यात येईल.