नाशिक - राज्यात सर्वत्र संचारबंदी लागू असताना नाशिकच्या कृषी उत्पन्न बाजार समितीमध्ये भाजीपाला विक्रेत्यांची आणि खरेदीदारांची गर्दी ओसांडली आहे. त्यामुळे, अत्यावश्यक सेवेच्या नावाखाली होणारी गर्दी प्रशासनाला चालते का, असा प्रश्न नाशिकमध्ये उपस्थित केला जात आहे.
राज्यात १०१ रुग्ण, मात्र नाशिककरांना नाही धास्ती; कृषी उत्पन्न बाजार समितीमध्ये गर्दी..
महाराष्ट्रात कोरोना बाधित रुग्णांची संख्या १०१ वर गेली असून अद्यापही नागरिकांना त्यांची धास्ती नसल्याचे चित्र नाशिकमध्ये बघायला मिळत आहे. राज्य सरकारने कोरोना प्रादुर्भाव रोखण्यासाठी आणि गर्दी टाळण्यासाठी राज्यात संचारबंदी लागू केली आहे. ह्यात भाजीपाला, किराणा, वैद्यकीय सुविधांना सूट देण्यात आली आहे. मात्र, ह्याचा गैरफायदा नागरिक घेत असल्याचे निदर्शनास येत आहे. नाशिक कृषी उत्पन्न बाजार समितीमध्ये सोमवार सकाळपासूनच भाजी खरेदी करण्यासाठी नागरिकांनी गर्दी केली आहे.