नाशिक - दिंडोरी तालुक्यात नाशिक पेठ रस्त्यावर सकाळच्या दरम्यान ग्रामस्थांनी जनावरे घेऊन जाणाऱ्या टेम्पोला पकडले. मात्र, वाहनचालक घटनास्थळावरून पळण्यात यशस्वी ठरला. पोलिसांनी घटनास्थळी धाव घेऊन संबंधित टेम्पो ताब्यात घेतला. तसेच जनावरांच्या अवैध वाहतूक प्रकरणी वाहनचालक आणि त्याच्या साथीदाराविरूद्ध गुन्हा दाखल केला आहे. पळून जाणाऱ्या वाहनचालकाचे नाव अब्दुल्ला शेख, तर त्याच्या सोबत्याचे नाव मिराज उर्फ खतीब शेख असून ते दोघेही अहमदनगरमधील निबाला संगमनेरयेथील रहिवासी असल्याची माहिती आहे.
दिंडोरी तालुक्‍यातील नाशिक पेठ रस्त्यावर उमराळे चौफुलीवरून शुक्रवारी सकाळी ८च्या सुमारास एक टेम्पो (आयसर, एमएच १७ बीडी ५४१६) ११ गायी आणि ३ गुरं घेऊन जात होता. ही बाब येथील ग्रामस्थांच्या निदर्शनास आल्याने त्यांनी सबंधित वाहनचालकास गाडी थांबविण्यास सांगितले. यावेळी चालकाने गाडी न थांबवता भरधाव वेगाने राशेगावकडे पळवली. ग्रामस्थांना या टेम्पोला रोखण्यात यश आले. मात्र, गाडीचा चालक घटनास्थळावरून फरार झाला.
हेही वाचा -नाशिक जिल्ह्यात साडेतीन लाख हेक्‍टर पिकाचे नुकसान, विमा कंपन्यांना सहकार्य करण्याचे निर्देश