नाशिक - कारागृह म्हटलं की सर्वानाच समोर दिसते ती काळकोठडी आणि शिक्षा भोगणारे कैदी. मात्र, चार भिंतींच्या आड कारागृहात हे कैदी काय करतात? त्यांच्या आवडी निवडी कशा जोपासतात. तर, कैद्यांमधे लपलेल्या कलाकाराचे कला-कौशल्यही याच काळकोठडीत बघायला मिळते. सध्या नाशिकच्या मध्यवर्ती कारागृहातील काळकोठडीत शिक्षा भोगत असलेल्या एका कैद्यांनी बनवलेल्या आकर्षक गणेश मुर्त्या सगळ्यांचे लक्ष वेधून घेत आहेत.
नाशिकमधील कारागृहातील कैद्याने बनवल्या आकर्षक गणेश मूर्ती
नाशिकच्या मध्यवर्ती कारागृहात सध्या गणेशोत्सवाचा एक वेगळाच अनुभव कैदी आणि अधिकाऱ्यांना येत आहे. जो अनुभव अधिकाऱ्यांच्या मनाला समाधान देणारा तर कैद्यांना काही चांगलं करून दाखवण्याची जिद्द देणारा आहे. नाशिकच्या मध्यवर्ती कारागृहात शिक्षा भोगणारा सागर पवार हा पेण मधील गणपती बनविणारा कारागीर आहे. आपल्या कलेला वाव मिळावा म्हणून त्याने जेल प्रशासनाला विनंती करून जेलमध्येच अत्यंत सुबक अशा शाडूमातीचे गणपती बनविण्याचा उपक्रम सुरू केला. त्याच्या विनंतीवरून कारागृह अधीक्षकांनी त्याला गणपती बनविण्यासाठी आवश्यक असणारी साधन सामग्री उपलब्ध करून दिली आणि सागरने देखील जन्माने कोणी गुन्हेगार नसतो, हे सिद्ध करत आपणसुद्धा एक चांगली व्यक्ती बनू शकतो याचा आदर्श इतर कैद्यांसमोर ठेवला आहे.
अत्यंत सुबक आणि आकर्षक दिसणाऱ्या या गणेशमूर्ती सागरने कुठल्याही साच्याचा वापर न करता हातानेच बनवल्या आहेत. या मुर्त्या येणाऱ्या गणेशोत्सव काळात जेल प्रशासन विक्री करणार आहे. गेल्या तीन वर्षांपासून सागर नाशिकच्या मध्यवर्ती कारागृहात अत्यंत सुंदर अशा गणेश मूर्ती बनवत आहे. इतर कैद्यांना देखील त्यानी ही कला शिकवून जवळपास २० कैद्यांच्या मदतीने या वर्षी सागरने तब्बल आठशे गणेश मूर्ती बनवल्या आहेत. मागच्या ३ वर्षांपासून सागरने बनवलेल्या गणेश मूर्तींना संपूर्ण राज्यातून मागणी असते. यंदाच्या वर्षी देखील जवळपास ५ ते ६ महिन्यांपासून सागर इतर कैद्यांच्या मदतीने जवळपास ८०० मुर्त्या बनवल्या आहेत. यंदाच्या वर्षी विशेष म्हणजे सागरने जवळपास 12 फूट अशी भव्य गणेश मूर्ती तयार केली आहे. यंदाच्या वर्षी या सर्व मूर्ती नाशिक मध्यवर्ती कारागृहाबाहेर असलेल्या एका हॉलमध्ये विक्रीसाठी ठेवण्यात आल्या आहेत. तसेच इतर वस्तूंचे देखील प्रदर्शन या ठिकाणी भरविण्यात आले आहे. बुधवारी या प्रदर्शनाचे उद्घाटन नाशिक पोलीस आयुक्त विश्वास नांगरे-पाटील यांच्या हस्ते करण्यात आले.
जेल म्हणजे फक्त गुन्हेगारांना बंदिस्त करण्यासाठी नसून त्यांना जगण्याची दिशा देणारे एक माध्यम असते. याच उद्देशाने जेल प्रशासनाने सागर सारख्या कलाकारांना हेरून त्यांना समाजाच्या मुख्य प्रवाहात आणण्यासाठी केलेला हा प्रयत्न असल्याची भावना जेल अधीक्षकांनी यावेळी व्यक्त केली.
