नाशिक- विधानसभा निवडणुकीत मतदान करण्याचे वेगवेगळ्या माध्यमातून आवाहन केले जात आहे. मात्र, नाशिकचे सलून चालक प्रभाकर सैनदाने आणि डॉक्टर सचिन देवरे यांनी एक अनोखा आदर्श घालून दिला आहे. मतदान करा आणि दाढी कटिंगवर 50 टक्के सूट मिळवा तसेच डॉ देवरे यांनी मतदान करा आणि आमच्या क्लिनिकमधून मोफत तपासणी करून घ्या, अशी ऑफर मतदारांना दिल्याने हे दोघे चर्चेत आले आहेत.
हेही वाचा -नाशकात मुसळधार पाऊस; बाजरीसह मका पिकाला फटका
गेल्या अनेक वर्षांपासून सैनदाने सलून चालवतात. उत्सव कोणताही असो हे बहाद्दर सलून चालक अग्रेसरच असतात. उत्पन्न अगदी मोजके, मात्र आपल्या हातून काहीतरी सेवा व्हावी म्हणून हे प्रयत्नशील असतात. लोकसभा निवडणुकीतही त्यांनी मतदारांना अनोखी ऑफर देऊन मतदान करण्याचे आवाहन केले होते आणि आता विधानसभा निवडणुकीतही त्यांनी ऑफर देऊन मतदान करण्याचे आवाहन केले आहे.
हेही वाचा -नाशकात निवडणुकीसाठी पोलीस प्रशासन सज्ज, तेराशे पोलीस असणार तैनात
लोकशाहीत ज्या मतदानाला महत्व आहे तेच मतदान करणे नागरिक टाळतात. त्यामुळे आपल्या हातूनही काहीतरी लोकशाही बळकट करण्यास मदत व्हावी म्हणून त्यांनीही आपल्या व्यवसायाच्या माध्यमातून ऑफर देण्याचा प्रयत्न केला आहे. जे नागरिक मतदान करतील आणि बोटाची शाही दाखवतील त्या मतदारांची मोफत तपासणी करून दिली जाईल, अशी ऑफर डॉ. सचिन देवरे यांनी दिली आहे.
