नंदुरबार - धुळे, जळगाव आणि नंदुरबार जिल्ह्यातील विविध भागातून दुचाकी चोरी करून त्यांची विक्री करणाऱ्या दोघांना नंदुरबार स्थानिक गुन्हा शाखेने ताब्यात घेतले. खोजल्या वन्या तडवी (रा.बिजरीगव्हाण, ता.अक्कलकुवा, ह.मु.तळोदा) आणि संदिप सुनिल ठाकरे (रा.तळोदा) अशी आरोपींची नावे आहेत. त्यांच्याकडून पावणे आठ लाख रुपये किमतीच्या सोळा दुचाकी आणि एक चारचाकी वाहन जप्त करण्यात आले आहे.
वाहनांंची चोरी करणाऱ्या दोघांना अटक
नंदुरबार शहरासह जिल्ह्यात दुचाकी चोरीच्या घटनांचे प्रमाण वाढले होते. त्यामुळे स्थानिक गुन्हे शाखेने एका पथकाची नियुक्ती करून दुचाकी चोरट्यांची शोधमोहीम हाती घेतली. तळोदा येथील बसस्थानक परिसरात सापळा रचण्यात आला. खोजल्या तडवी हा महागडी दुचाकी कमी किमतीत विकत असल्याचे पोलिसांच्या निदर्शनास आले. पोलीस दिसताच त्याने पळ काढला.