ब्रिटीश काळात भाजपा होती का? मंत्री गिरीश महाजनांचा संजय राऊतांना सवाल

Girish Mahajan On Sanjay Raut : देशातील सर्वांत मोठ्या घोडेबाजारांपैकी एक असलेल्या नंदुरबार जिल्ह्यातील सारंगखेडा यात्रा उत्सवात मंत्री गिरीश महाजन यांनी भेट दिली. यावेळी त्यांनी खासदार संजय राऊत (Sanjay Raut) यांना डायरिया झाल्याचा खोचक टोला लगावलाय.

नंदुरबार Girish Mahajan On Sanjay Raut : नंदुरबार येथील सारंगखेडा यात्रा उत्सवातील चेतक फेस्टिवलला (Chetak Festival) मंत्री गिरीश महाजन यांनी भेट दिली. यावेळी त्यांच्या समवेत आमदार जयकुमार रावल (Jayakumar Rawal) उपस्थित होते. यावेळी त्यांनी संजय राऊतांवर (Sanjay Raut) निशाणा साधला. उद्धव ठाकरेंना राम मंदिर लोकार्पण सोहळ्याचं निमंत्रण नाही, यावरही गिरीश महाजन यांनी प्रतिक्रिया दिली. त्यांचा पक्षही नाही आणि ते कुठल्याही पक्षाचे अध्यक्षच नाहीत. म्हणून त्यांना आमंत्रण दिलं नाही. मनोज जरांगे पाटील (Manoj Jarange Patil) यांना मुंबईला येण्याची गरजच पडणार नाही. मराठा समाजाला टिकेल असंच आरक्षण दिलं जाईल आणि मराठा समाजाला योग्य तो न्याय दिला जाईल, असं देखील यावेळी महाजन म्हणाले.

मंत्री गिरीश महाजन यांनी केली घोडेस्वारी : मंत्री गिरीश महाजन यांनी सारंगखेडा येथील घोडे बाजारात घोडेस्वारी केली. सारंगखेडामध्ये भरणारा जगविख्यात घोडे बाजार हा खानदेश आणि महाराष्ट्रासाठी भुषण असून, या घोडे बाजाराच्या नावलौकिकासाठी पर्यटन विभागातून सर्वोतोपरी मदत करण्याचं आश्वासन गिरीश महाजनांनी दिलं. यावेळी मंत्री गिरीश महाजन यांना घोडेस्वारी करण्याचा मोह आवरता आला नाही. ते आणि त्यांच्यासमवेत आलेले आमदार जयकुमार रावल यां दोघांनी घोडेस्वारीचा आनंद लुटला.

संजय राऊतांना डायरिया झालाय का? : संजय राऊत रोजच्या रोज नवीन शोध कुठून लावतात हा प्रश्न महाराष्ट्राला पडतो. महाराष्ट्राची जनता राऊतांना कंटाळली आहे. ते सकाळपासून डायरिया झाल्यासारखं बोलत राहतात, असा टोला गिरीश महाजन यांनी संजय राऊत यांना लगावला आहे. भाजपा हेच ब्रिटीशांना गोपनीय माहिती पुरवत असल्याचा आरोप करणाऱ्या राऊतांना गिरीश महाजन यांनी ब्रिटीशांच्या काळात भाजपा होती का? असा सवाल केला आहे. संजय राऊतांच्या डोक्याची किती किव करावी असं सांगत या माणसाचं काय करावं हा संपूर्ण महाराष्ट्राला प्रश्न पडलाय. डायरिया झाल्यासारखं राऊत सकाळपासून ओकतच राहतात. राऊतांमुळं लोकांची करमणूक होते, मात्र, त्या करमणुकीला लोकही कंटाळले आहेत. असं पात्र महाराष्ट्रात झालेलं कोणीही पाहिलेलं नाही, अशी टीका मंत्री गिरीश महाजण यांनी राऊतांवर केलीय.

उद्धव ठाकरे आता कोणत्याही पक्षाचे अध्यक्ष नाहीत : बाबरी पाडण्याचा कार्यक्रम हा कारसेवकांचा होता आणि कारसेवक कोण होते हे सर्वांना माहिती आहे. कार्यक्रम विश्व हिंदु परिषदेचा होता. आम्ही वीस दिवस कारसेवेत होतो. आम्हाला अटक झाली होती. आमच्याकडे पुरावे आहेत. तरी राऊत विचारतात की कोण गिरीश महाजन? आम्ही राऊतांना एकच प्रश्न विचारला की, आपण कोणत्या जेलमध्ये होता. कधी कारसेवक होतात, असेल तर पुरावा द्या. उद्धव ठाकरे आता कोणत्याही पक्षाचे अध्यक्ष नाहीत. पक्ष प्रमुख असेलल्या व्हीव्हीआयपी लोकांनाच राम मंदीर उद्घाटनाला बोलावलं आहे. तुमच्याकडे सात, आठ आमदार नाहीत, तीन, चार खासदार नाहीत, तुम्ही व्हीआयपी राहीलाच नाहीत. त्यामुळं स्वतः बद्दल गैरसमज आहे तो कमी करावा, असा सल्ला देखील गिरीश महाजन यांनी दिलाय.

मराठा समाजाला टिकेल असं आरक्षण सरकार देईल :मराठा समाजाच्या सुरू असलेल्या आंदोलनाबाबत गिरीश महाजन म्हणाले की, मनोज जरांगे हे वन मॅन आर्मी आहेत. त्यांना मुंबईला येऊन आंदोलन करण्याची गरजच पडणार नाही. त्यांच्यामागे संपूर्ण मराठा समाज आहे. त्या मराठा समाजाच्या आरक्षणाच्या मागणीला आम्ही टिकेल असं आरक्षण देण्याचाच प्रयत्न करणार आहोत. म्हणून मराठा समाजाला टिकेल असं आरक्षण सरकारकडून दिलं जाईल.

हेही वाचा -