नंदूरबार -शाळकरी मुली मासिक पाळीदरम्यान होणाऱ्या गैरसोईला घाबरून शाळेत जाणे टाळतात. परीक्षेच्या कालावधीतही त्यांचे शैक्षणिक नुकसान होते. ही बाब लक्षात घेत शहादा येथील माहेश्वरी महिला मंडळाने शाळेतच मुलींना सॅनिटरी नॅपकिनची सुविधा पुरवण्याचे महत्वाचे काम हाती घेतले आहे.
शहाद्यात शाळकरी मुलींना फक्त पाच रुपयात मिळणार सॅनिटरी नॅपकिन
मंडळाद्वारे अत्यंत कमी खर्चात सॅनिटरी नॅपकिनचे मशीन उपलब्ध करून देण्यात येते. देखभालीचा खर्च जास्त असल्याचे लक्षात घेऊन भविष्यात मशीन बंद पडणार नाही याची सोयही मंडळाने केली आहे. सुरुवातीला मशीनमध्ये १०० नॅपकिन या महिलांकडून मोफत दिले जातात. जेणेकरून, त्यातून येणाऱ्या पैशांमध्येच नंतर मशीनमध्ये पॅड रीफील केले जातील.