डोक्यात दगड घालून शेतकर्‍याचा खून; अज्ञाताविरुध्द गुन्हा

नवापूर तालुक्यातील श्रावणी शिवारात शेतकऱ्याचा डोक्यात दगड घालून खून करण्यात आला. या घटनेची माहिती मिळताच अप्पर पोलीस अधीक्षक चंद्रकांत गवळी, उपविभागीय पोलीस अधीक्षक रमेश पवार, स्थानिक गुन्हे अन्वेषण शाखेचे वरिष्ठ पोलीस निरीक्षक किशोर नवले यांनी घटनास्थळाला भेट दिली. याप्रकरणी अज्ञात आरोपीविरुद्ध गुन्हा दाखल करण्यात आला आहे.

नंदुरबार - शेतकऱ्याच्या डोक्यात दगड घालून खून केल्याची घटना नवापूर तालुक्यातील श्रावणी शिवारात घडली आहे. भटुलाल काशिनाथ परदेशी (वय 50), असे मृत शेतकऱ्याचे नाव आहे. याप्रकरणी अज्ञाताविरुध्द विसरवाडी पोलीस ठाण्यात खूनाचा गुन्हा दाखल करण्यात आला आहे.

खांडबारा येथील रहिवासी भटुलाल परदेशी यांची श्रावणी शिवारात शेती आहे. परदेशी हे शेतावर लक्ष देण्यासाठी शेतातील घरात मुक्कामाला थांबले होते. भटुलाल परदेशी यांच्या मुलीला मुलगा पाहण्यासाठी येणार असल्याने त्यांचा मुलगा मिलिंदकुमार याने वडिलांशी मोबाईलवर संपर्क साधण्याचा प्रयत्न केला. मात्र, त्यांच्याशी संपर्क झाला नाही. त्यामुळे मिलिंदकुमार वडिलांना शेतात घेण्यासाठी गेला असता वडील मृतावस्थेत आढळले. भटुलाल परदेशी यांच्या डोक्यावर आणि चेहऱ्याला गंभीर दुखापत झाली होती. रक्ताचा डाग असलेला दगडही घटनास्थळावर आढळला.

हेही वाचा -मुलाला हळद लागली...अन्ं पित्याने संपवले जीवन

या घटनेची माहिती मिळताच अप्पर पोलीस अधीक्षक चंद्रकांत गवळी, उपविभागीय पोलीस अधीक्षक रमेश पवार, स्थानिक गुन्हे अन्वेषण शाखेचे वरिष्ठ पोलीस निरीक्षक किशोर नवले यांनी घटनास्थळाला भेट दिली. श्वानपथकालाही घटनास्थळी पाचारण करण्यात आले होते. श्‍वानाने काही अंतरापर्यंत मार्ग दाखवला. मात्र, नंतर शेतातच घुटमळत राहिला.

मिलिंदकुमार परदेशी यांच्या तक्रारीवरून विसरवाडी पोलीस ठाण्यात अज्ञात मारेकर्‍याविरुध्द खूनाचा गुन्हा दाखल करण्यात आला आहे. पुढील तपास सहाय्यक पोलीस निरीक्षक गणेश न्हायदे, पोलीस उपनिरीक्षक चंद्रकांत शिंदे, सुरेश चौरे, राजेश येवले, दिनेश चित्ते, अतुल पानपाटील, प्रदीप वाघ करत आहेत.