नंदुरबारमध्ये बीएसएनएलची सेवा कोलमडल्याने ग्राहकांचे हाल

नंदुरबारमध्ये धडगाव आणि अक्कलकुवा तालुक्यात बीएसएनएलची सेवा पुन्हा कोलमडली आहे. दोन महिन्यांपासून या विभागातील वीज वितरण कंपनीचे साधारण साडेचार लाख रुपयाचे वीजबिल थकीत आहे.

नंदुरबार -जिल्ह्यातील धडगाव आणि अक्कलकुवा तालुक्यात बीएसएनएलची सेवा वारंवार कोलमडत असल्याने ग्राहकांना अडचणींचा सामना करावा लागत आहे. दोन महिन्यांपासून या विभागातील वीज वितरण कंपनीचे साधारण साडेचार लाख रुपयाचे वीजबिल थकीत आहे. त्यामुळे टेलिफोन सेवा खंडित आहे.

दूरसंचार विभाग आणि महावितरण कंपनी यांच्यात झालेल्या चर्चेनंतर थकीत रक्कम जमा करण्यास मुदतवाढ देण्यात आली होती. मात्र, बीएसएनएलने दिलेल्या मुदतीत वीज बिल न भरल्याने सातपुड्याच्या दुर्गम भागातील आठ मोबाईल टॉवरची विजजोडणी खंडित करण्यात आली आहे. यामुळे या भागातील सुमारे 60 हजार ग्राहक प्रभावित झाले आहेत.

हेही वाचा - अवकाळी पावसाने शेती 'पाण्यात'; गिरणा धरणातून विसर्ग सुरू

यामुळे या परिसरातील विविध बँका, मिनीबँक, शासकीय कार्यालयातील इंटरनेट सेवा पूर्णपणे बंद झाली आहे. परिणामी नागरिकांचे मोठ्या प्रमाणात हाल होत आहेत. अगोदरच दुर्गम असलेला हा भाग संपर्क सेवा कोलमडल्याने आणखी अडचणीत आला आहे. लवकरात लवकर बीएसएनएलची सेवा कार्यान्वित करावी, अशी मागणी परिसरातील नागरिक करत आहेत.