नांदेड- देशभरात कोरोना विषाणूने थैमान घातले आहे. भारतात कोरोनाबाधितांची सर्वात जास्त संख्या महाराष्ट्रात आहे. अशात या कठीण काळात अनेकजण शक्य ती मदत करत आहेत. अशात आता तीर्थक्षेत्र माहूरच्या मदतीसाठी बारामतीकर सरसावले आहेत. कर्जत जामखेडचे आमदार रोहित पवार यांनी माहूर शहरासाठी सॅनिटायझर पाठवले आहे.
कोरोनाच्या प्रादूर्भावामुळे देशभरात सॅनिटायझरचा तुटवडा आहे. याच पार्श्वभूमीवर बारामती ऍग्रो लिमिटेडच्यावतीने रेणुका देवी संस्थानला हे सॅनिटायझर पाठवण्यात आले आहे. माहूर इथल्या राष्ट्रवादी काँग्रेसच्या कार्यकर्त्यांच्या उपस्थितीत या सॅनिटायझरचे वाटप करण्यात आले. थेट बारामती ते माहूर असा साडे पाचशे किलोमीटरचा प्रवास करत हे सॅनिटायझर आमदार रोहित पवार यांनी पाठवले आहे, त्यामुळे माहुरकरांनी त्यांचे कौतुक करत आभार मानले आहेत.
