नांदेड - जिल्ह्यातील आत्महत्याग्रस्त शेतकऱ्यांच्या कुटुंबाची शेती युवासेनेने दत्तक घेतली आहे. पर्यावरण मंत्री आदित्य ठाकरे यांच्या वाढदिवसाचे निमित्त साधून युवासेनेने हा उपक्रम राबवला आहे. तसेच स्वतः युवासेनेचे जिल्हाप्रमुख माधव पावडे यांनी हातात नांगर धरून या शेतकऱ्याच्या शिवारात पेरणी केली.
आदित्य ठाकरेंच्या वाढदिवसानिमित्त युवासेनेचा उपक्रम... आत्महत्याग्रस्त शेतकऱ्याच्या शेतात पेरणी केली
खुरगाव येथील रमाकांत लेंडाळे या युवा शेतकऱ्याने नापिकीला कंटाळून आत्महत्या केली होती. मृत रमाकांतचे वृद्ध वडील जयराम लेंडाळे हे आर्थिक अडचणीत असल्याने त्यांची शेती पडीक होती. युवासेनेचे जिल्हाध्यक्ष माधव पावडे यांना ही बाब समजताच पावडे कुटुंबाच्या मदतीला ते धावून आले. यावर्षी या कुटुंबाच्या शेतीला लागणारे बी-बियाणे, खते कीटकनाशके यासह इतर सर्व साहित्य युवासेना पुरवणार असल्याचे जिल्हाध्यक्ष माधव पावडे यांनी सांगितले.