तन-मन-धनाने शिवसेना माझ्या सोबतच - आमदार प्रताप पाटील चिखलीकर

कोणी स्वतःला मोठे समजले म्हणून लढाई मोठी होत नाही. जिल्ह्यात भाजपला लोकसभेची निवडणूक सोपी जाईल. बाहेर काय चर्चा होते? याची चिंता नसल्याची अप्रत्यक्ष टीका आमदार प्रताप पाटील-चिखलीकर यांनी काँग्रेसवर केली.

नांदेड - गेल्या १५ दिवसांपूर्वी शिवसेना पक्षप्रमुख उद्धव ठाकरे यांची भेट घेऊन आशीर्वाद घेतला. आमचे सर्व मतभेद मिटले आहेत. मुख्यमंत्री देवेंद्र फडणवीस आणि उद्धव ठाकरे यांचे बोलणेही झाले आहे. त्या दोघांनी मिळून मला उमेदवारी दिली आहे. त्यामुळे खात्री आहे, की शिवसेना तन-मन-धनाने माझ्या सोबत राहील, असे आमदार प्रताप पाटील-चिखलीकर म्हणाले. भाजपकडून उमेदवारी जाहीर झाल्यानंतर ते पत्रकारांशी बोलत होते.

जिल्ह्यात भाजपची उमेदवारी नेमकी कोणाला मिळेल? याबाबत गेल्या अनेक दिवसांपासून उत्सुकता होती. मुख्यमंत्री देवेंद्र फडणवीस यांचे विश्वासू व कट्टर समर्थक म्हणून आमदार प्रताप पाटील-चिखलीकर यांची ओळख आहे. चिखलीकर यांना उमेदवारी जाहीर झाल्यानंतर या विषयावर पडदा पडला. उमेदवारी जाहीर होताच भाजप-शिवसेनेच्या कार्यकर्त्यांनी जल्लोष केला.

कोणी स्वतःला मोठे समजले म्हणून लढाई मोठी होत नाही. जिल्ह्यात भाजपला लोकसभेची निवडणूक सोपी जाईल. बाहेर काय चर्चा होते? याची चिंता नसल्याची अप्रत्यक्ष टीका त्यांनी काँग्रेसवर केली.

पक्षाने विश्वास दाखवत उमेदवारीची संधी दिली आहे. जिल्ह्याला मोठी पदे लाभूनही एक किलोमीटरही राष्ट्रीय महामार्ग आणू शकले नाहीत. उलट सध्या जिल्ह्यात मोठ्या प्रमाणावर महामार्गाचे काम चालू आहे. त्यामुळे जनतेला आता कळून चुकले, की जिल्ह्याचा विकास कोण करू शकते? त्यामुळे येणाऱ्या काळात प्रचाराचे अनेक मुद्दे असल्याचे ते म्हणाले.