नांदेड - जिल्ह्यात 'भारत बंद'ला संमिश्र प्रतिसाद मिळाला आहे. तसेच, स्वाभिमानी शेतकरी संघटनेचे नेते माजी खासदार राजू शेट्टी यांच्या आदेशानुसार संघटनेचे प्रदेशाध्यक्ष प्रा. प्रकाश पोकळे यांच्या नेतृत्वाखाली महाराष्ट्र बंदची हाक देण्यात आली होती. या हाकेला पाठिंबा देत अर्धापुर येथे स्वाभिमानी शेतकरी संघटनेकडून महाविकास आघाडीच्या सरकारने काढलेल्या कर्जमाफीच्या जीआरची होळी करण्यात आली.
स्वाभिमानी शेतकरी संघटनेने कर्जमाफीच्या जीआरची केली होळी
'भारत बंद'ला प्रतिसाद म्हणून शहरातील व्यापाऱ्यांनी स्वतःहून आपली दुकाने बंद ठेवली होती. बंदमुळे बाजारात आज शुकशुकाट होता. अत्यावश्यक सेवा वगळता बंदमध्ये सर्वांनी सहभाग नोंदवला. दरम्यान, शासनाकडून जाहीर करण्यात आलेली शेतकरी कर्जमाफी तसेच हमीभाव या दोन्हीही योजना फसव्या आणि शेतकऱ्यांची फसवणूक करणाऱ्या असल्याचा आरोप शेतकरी संघटनेने केला आहे.