Amritpal Singh: नांदेडमध्ये तपास यंत्रणा अलर्टवर; अमृतपाल समर्थकांची झाडाझडती, रात्रीतून कोम्बिंग ऑपरेशन सुरू

मोस्ट वाँटेड अमृतपाल याला पकडण्यासाठी देशभरात शोध मोहीम सुरू करण्यात आली आहे. अमृतपाल सिंग हा गेल्या नऊ दिवसांपासून फरार आहे. सात राज्यांतील पोलीसांसह राष्ट्रीय तपास यंत्रणाही त्याच्या मागावर आहे. नांदेडातही अमृतपाल सिंगचे समर्थक आहेत. त्यामुळे शनिवारी रात्री पोलीसांनी शहरातील काही भागात अचानक कोम्बिंग ऑपरेशन राबवून घरांची झाडाझडती घेतली आहे.

नांदेड: शहरात गेल्या नऊ दिवसांपासून वारीस दे पंजाब या खलिस्तान समर्थक संघटनेचा प्रमुख अमृतपाल सिंग हा फरार आहे. त्या पार्श्वभूमीवर महाराष्ट्र पोलीस सतर्क झाले आहेत. सात राज्यांतील पोलीसांसह राष्ट्रीय तपास यंत्रणाही त्याच्या मागावर आहे. नांदेडातही अमृतपाल सिंगचे समर्थक आहेत. त्यामुळे नांदेड पोलिस अलर्टवर होते. तसेच शनिवारी रात्री पोलीसांनी शहरातील काही भागात अचानकपणे कोम्बिंग ऑपरेशन राबवून घरांची झाडाझडती घेतली. याप्रंसगी अमृतपालच्या वारीस दे पंजाब या संघटनेच्या सदस्यांची कसून चौकशी करण्यात आली.

शहरात कोम्बिंग ऑपरेशन: वारीस दे पंजाब या संघटनेकडून देशविघातक कारवायांमध्ये सहभाग असल्याच्या आरोपावरून पंजाब पोलीस आणि राष्ट्रीय तपास यंत्रणांकडून या संघटनेच्या सदस्यांची धरपकड करण्यात येत आहे. संघटनेने एकेएफ नावाचे सैन्य, स्वतःचे चलन आणि खलिस्तानचा वेगळा नकाशाही तयार केल्याचे तपासात पुढे आले आहे. त्यामुळे देशभरातील तपास यंत्रणा अलर्ट आहेत. तसेच पंजाबमध्ये गुन्हा केल्यानंतर अनेक गुन्हेगार हे आश्रयासाठी येतात. त्यामुळे नांदेड पोलीसही बाहेरून येणाऱ्या प्रत्येकावरलक्ष ठेवून आहे. नांदेडात वारीस दे पंजाब या संघटनेचे अनेक सदस्य आहेत. त्यात अमृतपाल अद्याप सापडला नसल्याने सर्वांचेच टेन्शन वाढले आहे. तो नांदेडात येण्याची शक्यताही वर्तविण्यात आली होती. याकारणामुळे पोलीसांनी शनिवारी रात्री कोम्बिंग ऑपरेशन शहरातील काही भागात राबविले आहे.

शहरात समर्थकांवर वॉच सुरु: यावेळी अनेकांची कसून चौकशी करण्यात आली. नेमके किती जणांना पोलीसांनी उचलले याबाबत मात्र माहिती कळू शकली नाही. परंतु पुढेही अशाच प्रकारे कोम्बिंग ऑपरेशन सुरू ठेवण्यात येणार असल्याची सूत्रांची माहिती आहे. वारीस दे पंजाब संघटनेच्या विरोधात देशभरात कारवाई सुरू झाल्यानंतर नांदेडातील अमृतपालचे काही समर्थक तीर्थयात्रेचे निमित्त करून भूमिगत झाल्याची माहिती आहे. तसेच ते नेमक्या कोणत्या तीर्थयात्रेवर गेले आहे याची पोलीसांकडून माहिती काढण्यात येत आहे. तर शहरात असलेल्या समर्थकांवर वॉच सुरू असल्याची माहिती पोलीस सूत्रांनी दिली.

सायबर सेलचे काम वाढले:अमृतपालवर कारवाईच्या वेळी पंजाबच्या काही भागातील इंटरनेट सेवा बंद करण्यात आली होती. कारण सोशल मीडियाच्या माध्यमातून अफवा वेगाने पसरविता येतात. नांदेडात येथेही सोशल मीडियाद्वारे सामाजिक शांतता भंग करण्याचा प्रयत्न होण्याची शकता आहे. त्यामुळे सोशल मीडियावर सायबर सेलकडून वॉच ठेवण्यात येत आहे. त्यामुळे कोणत्याही अफवेला बळी पडू नये. असे आवाहन पोलीसांकडून करण्यात आले आहे.